Recientemente, Corsou tabatin e honor di ricibi 85 agencia di biahe di Argentina como parti di e di 13 congreso anual di Copa Vacations Argentina. Tabata e prome biaha cu un grupo asina grandi di agentenan di biahe for di Argentina a bishita Corsou. E meta di e bishita di 3 dia tabata pa e agentenan di biahe por a conoce i experencia Corsou, pa asina nan por a promove nos destinacion mas efectivo riba e mercado Argentino.
E programa di e evento a cuminsa cu un welcome party unda Minister di Desaroyo Economico, Sr. Ruisandro Cijntje, a duna un discurso di bon bini, invitando e agentenan di biahe pa disfruta y experencia pa nan mes loke Curaçao tin pa ofrece. E siguiente dia, e agentenan di biahe a bishita diferente hotel pa wak e facilidadnan cu cada hotel tabata ofrece. Cu e conocemento adheri, e agentenan di biahe por conseha nan clientenan miho tocante e miho opcionnan di acomodacion segun nan necesidadnan.
Na final di e di dos dia, Curaçao Tourist Board (CTB) a organisa un fiesta na playa unda e agentenan di biahe por a experimenta diferente actividadnan acuatico manera sea-doo , kayak , waterbike y otro actividadnan. E ultimo dia, e grupo a bay un tour na Willemstad cu trolley train y scooternan electrico pa siña tocante cultura y historia di Curaçao. Na final di e programa, e agentenan di biahe a disfruta di un tour di boto pa explora Corsou for di lama. E bishita na Curaçao tabata parti di un programa mas amplio, unda riba invitacion di e operadornan Copa Vacations, Delfos Tours, Logan Travel, Siga Turismo, Top Dest, y Tower Travel, e agentenan di biahe a experimenta tres pais diferente, Curaçao, Panama y Aruba.
Argentina ta un mercado cu ta crece pa Corsou. CTB ta contento cu su colaboracion cu partnernan di sector priva pa destaca e diversidad rico cu Corsou tin di ofrece.curacaochronicle.com
