ORANJESTAD,Aruba
Door di e situacion mundial di Corona-virus caminda cu fronteranan a wordo cera y/of vuelonan cancela, tin varios bishitante di nos isla cu a keda pega aki na Aruba pa motibonan fuera di nan alcance. Tecnicamente nan periodo di estadia recientemente a caduca of ta bay caduca den e proximo dianan. Entretanto tin un ‘Shelter in place’ na vigor.
Den lus di e circumstancianan menciona Minister di Husticia, den consulta cu IASA/Migracion Aruba, a introduci un maneho temporal pa cu e turistanan aki, a base di cual lo introduci un periodo di gracia te cu 17 di april 2020. Si e situacion general cambia prome cu e fecha ey e maneho lo por wordo adapta.
