ORANJESTAD,Aruba
Parlamentario Endy Croes a amplia riba e presupuesto cu a wordo trata durante siman. Berdad un presupuesto cu tur ingridiente pa alkansa un surplus di 46 miyon unda Aruba finalmente lo a cuminsa paga su debenan a bolter door di e crisis mundial di corona virus pa un deficit di 1.3 biyon florin. Expertonan di Banco Central a produci un (rapport) advies unda nan calculacionnan a jega na 1.2 biyon florin mientras Directie Economische Zaken van Handel en Industrie y demas expertonan a calcula esaki na 1.35 biyon florin. Turismo ta e factor di mas importante den esaki unda 25 mil tata y mama di famia a perde trabou reparti den 23000 empleado directo y 2000 ZZP’rs ( Zelfstandig Zonder Personeel) manera taxista pa nombra un ehempel di ZZP. Entrada na impuesto pa gobierno pa e motibo aki segun calculacion di expertonan lo cay cu 627 miyon. Salaris di e 25000 personanan aki ta calcula na 64 miyon pa luna sin calcula tips etc. Pa esnan cu perde trabou gobierno a lanta “FASE” esta “Fondonan Asistencia Social di Emergencia” bou di cual 23000 empleado cu a perde trabou y 2000 ZZP’rs manera ( taxista) por aplika pa un ajudo di Afl.950 pa luna pa 3 luna largo. Pa esaki a reserva 214 miyon. Pa companianan MKB’rs pues Middel en Klein Bedrijf inscribi na SVB y cu menos di 50 empleado gobierno a presupuesta 40 miyon pa brinda un ayudo pa nan no mester sera y trata na mantene empleadonan den servicio. Banda di esaki lo bin un incentivo fiscal pa nan. Pa SVB y AZV a presupuesta respectivamente 179 miyon y 262 miyon di acuerdo cu calculacionnan di expertonan. Esaki nan hunto ta alkansa un suma di 683 miyon florin. Parlamentario Endy Croes ta splika cu mundo henter y Aruba no ta diferente ta bayendo cu pasonan gigante atras pero lo mantene nos Fe y speransa intacto cu bou Liderazgo di Evelyn Wever Croes nos lo “bounce” bek pa para fuerte riba nos pia. Esaki ta exigi trabounan duro di cada concuidadano pa juda nos construi e pais aki bek. Pero nos salud ta na promer lugar awor. Lokual Parlamentario Endy Croes ta lamenta masha hopi ta e hecho cu AVP durante e reunion a permitinan mes pa hunga politica barata. AVP a keda te 6pm atardi na Parlamento y a vota na fabor di un mocion di POR pero mesora a sali y bandona edificio y no a keda pa vota riba e prespuesto mes. Increibel pero berdad. Esaki ta muestra di con hopi AVP tin pueblo den su curason. Pues AVP a laga 25000 mama y tata di famia na caya na e momento cu mas pueblo tabata tin mester di nan pa aproba e presupuesto pa nan por haña e ajudo di Afl.950, AVP a dicidi di bandona e edificio y keda SIN VOTA. Sin e presupuesto aproba Gobierno no por subi mercado pa presta plaka pa juda e famianan den desesperacion y sin entrada na e momentonan aki. Parlamentario Croes alaves ta bisa cu no ta e momento pa hasi politica paso nos ta den un crisis y hustamente ta expresa su sentimento pidiendo Aruba pa nos uni. Pero banda di esaki pueblo tin e derecho di sa e berdad. AVP a traciona un bes mas 25000 hendenan cu a perde trabou reparti den 23000 mil empleado y 2000 ZZP’rs den cual tur e taxistanan ta cay. Aruba Ban uni pa bringa corona virus y no ta e momento p[a hunga politica of trata na score un goal politico Parlamentario Croes ta termina splikando.