Segun ultimo datos cu Sociaal Crisis Plan a acumula, di casonan di abuso di menor, ta indica cu 2 di cada 3 mucha bou di 16 aña cu ta victima di abuso ta wordo abusa door di nan mesun famia of conoci di famia. Esaki ta indica cu alrededor di 80% di casonan di abuso di menor ta trata di un abusador cu ta biba den famia! E datos nan aki ta pone bo bira tristo, pero e ta realidad cu hopi mucha y hoben ta biba cu ne aki na Aruba. Abo por yuda combati e problema grandi di abuso di menor. Pero con?
Abuso di menor por sosode na cualkier luga y na cualkier momento. E por pasa na cas, na scol, den bario, na cas di famia, den auto anochi of den dia. Un abusador ta un persona cu lo intimida un victima pa e keda keto y gaña, pa asina no wordo stroba di su crimen. Sea alerta! Semper busca ayudo. Yama Bureau Sostenemi si bo ta sospecha di abuso di menor na 5881010.
Ora bo ignora e problema, bo ta tolera e abuso. Preveni abuso di menor y busca ayudo. Ora ta trata di abuso di mucha, tin diferente instancia cu ta traha pa combati e problema aki den nos comunidad. Pero e ta importante pa busca ayudo na e luga corecto. Nos ta inclui un lista:
- Pa conseho ora tin sospecho di abuso di menor yama Bureau Sostenemi na 5881010.
- Pa conseho pa famia y lantamento di mucha y hoben yama Centro pa Hoben y Famia na 5281200.
- Pa informacion tocante sexualidad y prevencion yama Famia Planea Aruba na 5889591.
- Pa ayudo cu violencia domestico yama FHMD Fundacion pa Hende Muhe den Dificultad na 5671670.
- Pa ayudo psicologico y problema mental yama Respaldo na 2815000.
- Pa informacion tocante addicion di droga y alcohol yama Fada Aruba na 5832999.
- Si bo a experiencia abuso di menor actua mesora, yama 100 y haci denuncia na polis!