Durante luna di november e programa di Aruba Health & Happiness Code (HH Code) ta lansa un campaña pa promove e companianan liga na HH Code den e area turistico (high rise area). Desde e siman aki lo por mira diferente stacion di bus cu e propaganda ‘Stay safe with our certified partners’.
E meta principal di esaki ta pa promove na nos bishitantenan y na nos comunidad, pa bishita e companianan cu tin nan seyo di Aruba Health & Happiness Code, como establecimentonan cu ta cumpli cu e reglanan nacional di seguridad.
Desde inicio di e programa di e Aruba Health & Happiness Code, mas cu 2.500 compania a registra pa e seyo di color. Den transcurso di e ultimo lunanan, departmento di Salud Publico a controla y inspecciona un cantidad di compania cu e seyo di color. A otorga a base di esaki e seyo di oro na un total di 788 establecimento, principalmente den e sectornan di F&B, supermercado y tienda. Oficina di turismo conhuntamente cu DVG ta duna un palabra di elogio na tur establecimento cu ta cumpli cu e protocolnan, esaki sigur lo yuda Aruba den e lucha pa reduci e nivel di contagio actual di COVID-19.
Nos kier a haci un recordatorio na e companianan pa mantene nan mes na procotolnan cu actualmente ta na vigor:
- Haci uzo di hand-sanitizer of laba man frecuente
- Uzo di tapa boca pa bishitante como tambe coleganan trahando hunto
- No mag di tin mas cu cuater adulto aglomerando
- Mantene un logboek di limpiesa
Nos ta pidi tur establecimento nan cooperacion pa mantene nan mes na e protocolnan stipula.
Pa mas informacion tocante e HH Code y con pa registra por bishita www.arubacovid19.org/ahhc of por manda un email na healthcode@aruba.com