Kolegio Ehekutivo ta haña importante i ta mira e balor ku tin hende ku ta kuida otro persona (mantelzorg) na Boneiru. Pa e motibu ei Kolegio Ehekutivo a skohe pa rekonosé esnan ku ta duna e kuido aki i a proklamá 10 di novèmber komo dia ofisial di ‘mantelzorg’.
Den e akuerdo entre ministerio di Volksgezondheid, Welzijn en Sport i Bonieru ‘2019-2022, Boneiru Salú i Bienestar’ ta menshoná e akto pa kuida un otro, esta ‘mantelzorg’, komo un dje tópikonan ku konhuntamente lo traha riba dje. E intenshon tei pa huntu buska posibilidatnan pa asin’ei yega na un sistema ku ta duna esnan ku ta kuida un otro persona alivio ya nan tambe por sosegá i rekargá nan energia.
Ku e dia aki Kolegio Ehekutivo ke duna un apresio na esnan ku ta kuida i yuda un otro persona, speshal esnan ku ta den serkania sosial.
