Prome cu e Opening Ceremony di e weganan Paralimpico na Tokyo fin di e luna aki, lo tin un evento international cu ta yama #Wethe15. Esaki ta un campaña pa conscientisa mundo henter cu tin 1.2 biyon persona cu un desabilidad den mundo, esaki ta 15% di e mundo. E campaña aki ta un movecion cu tin e apoyo di United Nations, International Paralympic Committee, International Disability Alliance y demas organisacionnan global cu ta apoya e derecho humano di hendenan cu discapacidad rond mundo.
E meta di #Wethe15 ta pa caba cu descriminacion contra di personanan cu desabilidad y transforma nan bida. Globalmente lo cende of illumina algo cu un lus biña como mustra di sosten na e campaña di #Wethe15.
Prome Minister Evelyn Wever-Croes, hunto cu e Atleta Paralimpico di Aruba, señor Elliott Loonstra, a cende luz biña pa asina esaki ilumina Bestuurskantoor na biña pa mustra sosten na e campaña global di #Wethe15.
Pa Gobierno di Aruba ta importante di por apoya e campaña global #Wethe15. P’esey nos a ilumina Bestuurskantoor cu luz biña pa duna apoyo y sosten na esnan cu limitacion. Inclusion ta un punto halto riba agenda di Gobierno pa por inclui tur hende den nos comunidad”, Prome Minister a duna di conoce.