Gobierno y sindicatonan SIMAR, SPA, SEPPA y SADA ta na mesa y no a yega na un acuerdo ainda. Gobierno a indica cu tin dos opcion riba mesa:
- TRAHA MENOS ORA
Sindicatonan a expresa cu nan lo kier traha e ekivalente na 12,6% na oranan menos. A papia di algun proposicion. Gobierno ta en espera di consehonan pa sa si esaki por na forma responsabel teniendo cuenta cu interes general di pais Aruba.
- HAYA 5% DI SALARIO BEK A CAMBIO DI DIANAN ATV
Gobierno di su banda a propone un otro alternativa. Pa mantene e 12.6% cu ainda ta condicion di Hulanda, Gobierno ta propone pa paga empleadonan e 5% riba e salario di cada luna bek, y a cambio e empleado ta entrega dianan di vakantie. E cantidad ta depende di e fecha cu esaki drenta na vigor. E ta ekivalente na 13 dia ATV pa aña. E opcion aki a bin riba mesa despues cu siman pasa Prome Minister a delibera riba esaki cu Secretario di Estado nobo van Huffelen.
Gobierno a tuma nota di e publicacion den medio di comunicacion di e sindicato Simar. Gobierno ta di opinion cu mientras cu tin espacio pa negocia Simar no por bay over pa tuma un desicion pa scol cuminsa 1 ora mas laat. Gobierno ta haci un yamada na Sindicato Simar pa sigui na mesa di negociacion. Pues orarionan di scol ta sigui normal.
Dialuna Gobierno y sindicato ta na mesa atrobe pa sigui delibera riba ambos opcion.