Diadomingo ultimo, e Copa Aruba Bank Liga Plata 5 x 5 den futbol femenino a sigui cu buelta number dos riba e canchanan di mini turf na Estrella y Britannia.
Na tereno di Britannia a tuma lugar dos wega. Den e prome wega e ekiponan di Sv Arsenal Aruba y S.v. Bubali Noord-Aruba a topa otro. Aki den un encuentro hopi sera, Arsenal a sa na bay cu e victoria di 2 – 0. E golnan di Arsenal a wordo anota pa Andrienne Morillo y Lucienne Morillo. Den e di dos partido, e ekiponan di Sv Dakota Damas y ASV RIVER PLATE a topa otro. Aki den un bon wega y hopi pareu, Dakota y Riverplate ta parti punto unda e wega ta keda empata 1 – 1. E gol di Dakota a cay trempan den e wega pa medio di Jamila Mathilda pero tabata e hungador Akyrah Davelaar cu ta empata e wega pa Riverplate pa medio di e penalti.
Na tereno di Estrella na Sta Cruz, e ekipo di Sport Vereniging La Fama ta gana SV Estrella Futbol cu e score final di 4 – 0. E golnan di La Fama a bini di Kayleen de Cuba, Joanne Villamarin y Alicia Delgado cu ta anota dos gol. Den e prome wega e clash a bay entre Rca Damas y Britannia Damas y aki e ekiponan a parti punto unda e partido a termina 2 – 2. E golnan di Britannia a wordo anota pa Ashlynne Franken y un autogol mientras pa RCA ta anota Zaylee Illes y Caylee Geerman.
Tuma nota cu diadomingo dia 17 di April no lo tin wega programa mientras cu e campeonato lo sigui diadomingo 24 di April pa 4or unda e weganan lo continua riba terenonan di Britannia y Estrella.
