Fraccion di PPA no a limita su cuestionnan na Parlamento. Awor e partido a formalisa su preocupacionnan den un carta oficial dirigi na Conseho di Minister, caminda e ta solicita documentacion y aclaracion legal tocante e contrato di 2.1 miyon florin financia pa medio di Aruba Tourism Authority (ATA).
Durante su conferencia semanal, lider di fraccion Eduard Pieters a splica cu e carta no ta un atake politico ni un intento pa paralisa un proyecto di recogemento di desperdicio.
“E carta ta un oportunidad pa Gobierno demostra cu e proceso a sigui conforme ley. Si tur cos ta corecto, mustra e documentonan.”
Segun Pieters, e carta ta basa riba cuater punto legal cu, segun PPA, ainda no a wordo aclarea durante e reunion publico den Parlamento yama pa PPA.
Cuater punto cu PPA kier aclarea
E prome punto ta toca e uzo di articulo 20 di e Landsverordening Imstelling Aruba Tourism Authority. Segun Pieters, si minister a duna un instruccion formal na ATA pa financia e proyecto, Parlamento tin derecho di haya e documento oficial cu ta confirma e decision ey.
E di dos ta trata di articulo 21, cu, segun PPA, ta obliga gobierno y ATA sigui e procedimento di destaho publico pa e contratonan di e magnitud aki. Pieters a afirma cu, te awe, ningun evidencia di un proceso completo di destaho publico a wordo presenta na Parlamento.
Di tres, PPA ta cuestiona si e proyecto realmente ta cay bou di e meta legal di ATA, manera defini den articulo 2 di e Landsverordening. Segun Pieters, ATA a wordo crea pa fortalece e producto turistico di Aruba, no pa asumi e responsabilidadnan cu tradicionalmente ta na encargo di otro ministerio of entidad publico.
Finalmente, e carta tambe ta plantea preocupacion tocante e principio di bon gobernacion, argumentando cu transparencia y igualdad di oportunidad pa diferente empresa ta elemento esencial den maneho di fondo publico.
“Nos no ta pidi fabor”
Pieters a enfatisa cu Parlamento no ta solicita ningun privilegio. “Nos no ta pidi fabor. Nos ta pidi e documentonan cu Parlamento tin derecho constitucional di haya.”
Segun e parlamentario, e reunion publico a resulta den hopi splicacion verbal, pero no den e evidencia documental cu por confirma cu e proceso a sigui e marco legal.
PPA kier mira, entre otro, e documentacion relaciona cu e destaho publico, e ‘ministeriele beschikking’ y cualkier otro acto administrativo cu ta sirbi como base pa e decisionnan tuma.
Gobierno tin oportunidad pa coregi
Contrario na loke algun declaracion politico por pensa di haci, Pieters a bisa cu e obhetivo principal di e carta no ta pa crea confrontacion, sino permiti pa Gobierno contesta formalmente y tuma pasonan pa coregi e posibel erornan.
Segun Pieters, si e documentonan demostra cu tur procedemento a wordo sigui, e cuestion legal automaticamente lo keda aclarea. Pero si no por presenta e base legal, Gobierno mester splica con lo remedia of coregi e situacion.
“Nos ta dunando Gobierno un oportunidad pa drecha cualkier eror, si realmente tin un eror cometi.” Pieters a agrega cu PPA no ta contra pa un Aruba mas limpi ni na inversion den recogemento di desperdicio. E partido solamente ta insisti cu cualkier proyecto, sin importa con positivo e meta por ta, mester respeta e leynan cu ta proteha transparencia y bon gobernacion. ”E fin no ta hustifica medio”.
PPA a confirma cu lo analisa e contesta oficial di Gobierno, prome cu determina cual lo ta e siguiente paso parlamentario y legal den e caso aki.