Aruba a yega na un crisis di identidad Arubiano. Fundacion SIKI ta hopi preocupa; e no ta trata solamente di e hecho cu e gobierno di AVP-FUTURO no ta respeta nos constitucion y e leynan di Aruba. Gobierno di AVP-FUTURO ta e prome gobierno den historia politico di Aruba cu ainda no a reparti e carteranan pa e gobierno por funciona ainda e gobierno actual no tin e Landsverordening instelling ministeries (LIM).
E LIM ta hopi importante pa e presupuesto di Pais Aruba, pa ora un minister ta lanta un caso den corte, y pa hopi otro parti den un gobierno. Na e momentonan aki, Aruba tin minister cu ta carga un cartera, pero oficialmente ta trahando te dia di awe cu e carteranan di e gobierno anterior. Esaki ta un situacion hopi confuso y ta papia hopi di e gabinete AVP-FUTURO, cu ni na un LIM nan no por a yega cu otro.
E Landsverordening instelling ministeries (LIM) ta un di e prome cosnan cu un gobierno mester atende cu ne pa por sigui goberna un pais, pero esaki ta sosode solamente si realmente un gobierno ta respeta su mes y ta respeta e procesonan interno di Pais Aruba.
Hopi biaha ta papia cu Hulanda ta pone presion riba Aruba, pero si nos mes no ta respeta nos mes, con nos kier pa Hulanda of otro pais respeta nos? Presidente di fundacion SIKI, hurista Jayburtt Dijkhoff, ta haya cu e situacion aki ta hopi alarmante. Tin hopi rapport cu ta bisa cu Pais Aruba ta un “low trust society”; esaki kiermen cu practicamente e poblacion no tin confiansa den gobierno mas, den parlamento, den departamentonan, den husticia, ni den polis. Pueblo di Aruba mester cuminsa spierta for di soño y cuminsa cuestiona.
Si Aruba mester keda den silencio, Aruba ta bay den un rumbo cu nos yun no ta desea y a kies pe. Loke ta hopi importante pa pueblo sa ta cu un taki bo por kibra, pero un boshi taki – cu ta e pueblo uni – hamas ningun hende no por kibra. E tactica cu ta wordo uza cada bes ta pa parti nos den color politico, y ta importante pa e pueblo cuminsa cuestiona kico ta pasando, exigi pa e gobierno duna cuenta di nos propio pais, y respeta nos leynan y nos pueblo tambe sin hustifica un color.