Gobierno ta sigui celebra cu Aruba su economia ta creciendo, turismo ta bati record y pais tin un surplus financiero. Pero pa parlamentario Eduard Pieters (PPA), e pregunta cu pueblo realmente kier haya contesta riba dje ta hopi mas simpel. “Si Aruba tin tanto placa, unda e placa ta?”
Durante su conferencia semanal cu prensa, Pieters a pone directamente den duda e diferencia entre e imagennan positivo cu Gobierno ta presenta y e realidad cu ciudadano ta mira tur dia.
Segun e lider di fraccion di PPA, e exito economico no tin balor si e pueblo no ta sinti e resultado den nan bida diario.
Centro di ciudad ta sigui muri
Un di e ehempelnan cu Pieters a uza ta e estado di Oranjestad. Segun Pieters, diferente inversionista local a inverti miyones di florin den edificio y negoshi den centro di ciudad, pero awor nan ta para, sperando cu Gobierno finalmente ta duna direccion tocante e revision di e ROPV (Ruimtelijk Ontwikkelingsplan met Voorschriften).
“E inversionistanan no ta pidi regalo. Nan ta pidi siguridad. Nan kier sa den unda Gobierno kier hiba centro di ciudad, prome cu nan sigui pone miyones di florin den e proyectonan.”
Segun Pieters, e incertidumbre ta paralisa e inversionnan local hustamente den un momento cu Gobierno ta papia di crecemento economico.
“10 meter di klinker no ta vision”
Pieters tambe a critica loke el a yama e falta di accion concreto di Ministerio di Infrastructura.
Despues di mas cu un aña y mey di gobernacion, e parlamentario a bisa cu e resultado mas visibel cu pueblo por mira den centro di Oranjestad, ta apenas algun meter di klinker nobo.
“Dies meter di klinker no por ta presenta como un vision pa revitalisa Oranjestad.”
Segun Pieters, embeyecementonan chikito na diferente parti, no ta substitui un plan integral pa recupera e curason comercial di Aruba.
Solucionnan tin
Contrario na solamente critica, Pieters tambe a presenta diferente proposicion atrobe. Pieters a enfatisa cu Gobierno mester acelera e actualisacion di e ROPV pa permiti mas inversion den Oranjestad y San Nicolas. Algun cambio cu PPA ta propone:
*aumenta e densidad residencial den centro di ciudad;
*permiti mas construccion vertical den cierto area;
*revisa zonificacion pa probecha e espacio urbano existente mihor.
Segun Pieters, construyendo mas den ciudad, Aruba por crea mas vivienda, sin sigui sacrifica naturalesa, manera Burubundo. “Si nos desaroya Oranjestad y San Nicolas cu mas inteligencia, nos por resolve parti di e crisis di vivienda, na mes momento preserva nos espacionan natural y stimula economia na San Nicolas y Oranjestad”
Un ‘voorbereidingsbesluit’ por activa inversion mañan
Pieters tambe a haci un apelacion directo na minister di Infrastructura.
Segun Pieters, Gobierno por inmediatamente firma un
voorbereidingsbesluit pa duna e inversionistanan claridad, mientras e revision completo di e ROPV ta sigui. “Esey so lo permiti caba, cu diferente proyecto local cu awor ta tranca, por sigui avanza cu siguridad riba nan inversion.” Segun e parlamentario, cada luna di incertidumbre ta representa inversion cu Aruba ta perde.
E pregunta principal ta sigui mescos
Pero pa Pieters, infrastructura ta solamente un sintoma di un problema mas grandi.
Gobierno ta sigui papia di surplus. Gobierno ta sigui papia di record economico.
Pero e ciudadano comun, no ta mira e resultado. “E bodycamnan y e dashcamnan pa polis ainda no t’ey. Diferente caminda ta sigui deteriora. E supuesto luznan cu a priminti cu lo pone pa dia 5 di augustus, ainda no ta t’ey. Centro di ciudad ta sigui warda riba inversion’ problemanan di adicto ambulante for di control y costo di bida ta sigui subi.”
Pieters tambe a cuestiona e aparente contradiccion entre un pais cu financieramente ta prospera y diferente departamento publico cu ta sigui opera cu falta di inversion.
Economia fuerte no ta suficiente
Pa PPA, e berdadero exito di un gobernacion no ta midi solamente den surplus of crecemento economico. “E ta midi den loke pueblo por mira, uza y sinti.” Y te ora cu e inversionnan no ta yega na infrastructura, siguridad, vivienda y renovacion urbano, e pregunta lo sigui presente.
“Aruba tin surplus. Economia ta bay bon, pero pueblo tin derecho di sa: unda e placa ta?” Eduard Pieters a finalisa bisando.