Gobièrnu di Boneiru ta atvertí komunidat pa no kome e pindakas di e marka JIF ku e kodigo di 7 number entre e numbernan 1274425 – 2140425. CDC (Center for Disease Control) na Merka a saka un advertensia pa no bende, usa òf kome e pindakas aki debí ku esaki ta kontaminá ku e bakteria di Salmonella.
E bakteria di Salmonella ta un bakteria ku ta resultá den kurpa humano pa via di kuminda òf kos di bebe. E sigiente síntomanan aki ta keda kousá dor di e bakteria di salmonella; diarea, keintura, kram severo den barika i sakamentu. Pa personanan ku salú mas vulnerabel esaki den sierto kasonan por tin resultado fatal.
Si bo a kumpra e pindakas di e marka JIF ku e kódiko ariba menshoná, no usa òf kome esaki. Direktorado di Supervishon i Mantenshon di lei ta vigilá e situashon aki. Den kasonan asin’aki Direktorado di Supervishon i Mantenshon ta den kontakto ku importadónan i mini- /supermerkado. Pa kualkier pregunta por tuma kontakto ku Direktorado di Supervishon i Mantenshon di lei na : 715 5300