Departamento di Enseñansa Aruba (DEA) ta recorda tur studiante cu a aplica pa un Arubalening cu “Reisticketkrediet” pa bay studia na Hulanda entrante augustus 2022, tocante e proceso pa haya “E-ticket” y e fechanan di biahe.
E-ticket
Den e aanvraagformulier den e Arubalening Portal, por wak na “aanvullend product” si a pidi pa un “Arubalening NL Reisproduct”. Si e studiante a scoge pa un “Reisticketkrediet”, e studiante aki ta biaha cu e grupo.
E compania Discovery Travel, ubica na Renaissance Marketplace, ta e compania cu lo percura pa entrega di e “E-ticket” na e studiantenan cu ta biaha den e grupo cu Arubalening.
Despues cu e studiante entrega su “Overeenkomst tot geldlening” y su “Verklaring van toekenning” na seccion Studiefaciliteiten di DEA, e studiante por tuma contacto cu Discovery Travel pa cuminsa e proceso pa haya su “E-ticket”.
Pa “book” e “reisticket” y ricibi e “E-ticket” e studiante mester entrega na Discovery Travel via email info@discoveryaruba.com:
Copia di paspoort
Copia di Verklaring van toekenning
Por haci esaki entre awe te cu 18 di juli 2022.
Discovery Travel na su turno lo manda e “E-ticket” pa e studiante via e-mail.
Fecha di biahe
E fechanan di biahe pa aña 2022 ta dianan 1 y 2 di augustus 2022.
Dia 1 augustus 2022 ta biaha e studiantenan cu ta bay studia na: Arnhem, Nijmegen, Wageningen, Groningen, Leeuwarden, Maastricht, Eindhoven, Den
Bosch, Rotterdam y Enschede.
Dia 2 augustus 2022 ta biaha e studiantenan cu ta bay studia na:
Den Haag, Delft, Amsterdam, Diemen, Utrecht/Amersfoort, Leiden, Breda, Tilburg, Zwolle y Deventer.
Mas informacion
Pa cualkier pregunta relaciona cu e proceso aki por manda un email na
arubalening@ea.aw of un whatsapp na 594-4140.
Pa mas informacion por acudi na nos website ww.ea.aw y busca Arubalening (Portal)
na letter A den e alfabet menu. Tambe ta sugeri studiantenan pa sigui Departamento di Enseñansa Aruba riba Facebook y/of Instagram @EducationAruba pa keda na altura di tur informacion.
Personal di DEA y seccion Studiefaciliteiten ta desea tur studiante hopi exito den e etapa nobo cu ta bay cuminsa. Keda kere semper den bo mes y bo soñonan. E mihor inversion ta den bo mes.