PPA ta kere firmemente cu ora eleccion tuma lugar, esey ta un momento di celebracion democratico. No tur pais den mundo tin e privilegio aki, unda un pueblo por expresa su boluntad democraticamente y nos mester reconoce y honra esey. Dia 29 di oktober, Hulanda a bay urna electoral y e resultado ta cla. Democracia ta bibo y e voto di pueblo Hulandes a papia cla. “Nos, como Partido Patriotico Arubano, a sigui e desaroyo di cerca. No solamente paso Aruba tin un relacion special cu Hulanda, pero tambe paso e eleccionnan na Hulanda tin capa di influencia desaroyo politico y economico na Aruba mes. Di 150 asiento den Tweede Kamer, e resultado final tabata uno sorpresivo, mustrando un dinamica politica diferente y e deseo di un comunidad pa un direccion nobo,” Eduard Pieters a expresa.
Resultado sorpresivo
Segun e encuestanan, hopi tabata mira PVV, GroenLinks–PvdA, VVD y CDA lidera; pero e sorpresa grandi tabata D66, cu a sali como e partido di mas grandi. Eduard Pieters a enfatisa:“Di banda di fraccion di PPA, nos no a mira esaki ta bin, pero esey ta democracia: dinamico, bibo, impredecibel y semper basa riba bos di pueblo. Nos kier felicita D66 y henter pueblo Hulandes pa un eleccion transparante y un resultado cu ta mustra un compromiso fuerte cu e balornan democratico. Un palabra di pabien y hopi exito tambe pa lider di D66, Rob Jetten, cu tin honor y responsabilidad grandi awor pa guia Hulanda den e etapa nobo aki. Pabien tambe na PVV, GroenLinks–PvdA cu ta mantene un bos social fuerte y tur otro partido cu a participa den e proceso democratico”.
Vision alinea cu PPA
D66 ta un partido social liberal: un kombi di libertat individual y avance social, di progreso y modernizacion. PPA mes tambe tin su raís den movimiento social democrata y progresista. “Si nos mira bek den tempo di Juancho Irausquin y e direccion di “Plan Nos Aruba 2050”, nos ta mira mesun ideal: progresista, husticia social y construccion di un futuro sostenibel pa nos pueblo,” Pieters a vocifera.
Un panorama politico mas social
E panorama politico Hulandes awor ta mustra di por ta un posibilidad pa un coalicion mas social, mas central, cu mas enfoke riba igualdad di oportunidad y desaroyo humano. “E ideologia di D66 cu tin simpatia pa libertad y autodeterminacion di e hende pero nos por aplica esaki den Reino Hulandes tambe. Esaki ta un señal hopi positivo pa Aruba. Nos ta spera cu e relacion futuro lo ta basa riba respeto mutuo, comprension y un mirada progresista riba autonomia y desaroyo di e islanan,” Pieters a subraya.
Segun Eduard, esaki sigur ta algo hopi importante pa nos como isla. Paso Aruba ta den un fase crucial di discusion tocante Rijkswet HOFA y Landsverordening WHO, unda autonomia y gobernabilidad local ta central. Un gobierno Hulandes mas habri pa dialogo social y autonomia por crea un espacio mas husto pa trata e temanan aki.
PPA ta mantene su posicion firme: Autodeterminacion Pa Aruba
Finalmente Eduard Pieters a indica: “PPA ta keda firme den nos vision pa autodeterminacion, progreso y respet mutuo. Y awor cu D66 a sali triunfante, nos ta mira un potencial aliado den Reino Hulandes. Nos tabata planea caba pa tene encuentro cu GroenLinks–PvdA, CDA y D66, y awor cu eleccion a pasa, e momento ta yega pa sigui cu esunnan na mando den dialogo constructivo, respetuoso y enfoca riba futuro di tur miembro di Reino”.
Press release: PPA