Dialuna a tuma lugar e fundamento di Aruba Port Development N.V. caminda minister di Turismo y Salud Publico sr. Dangui Oduber, director di APA NV sr. Figaroa y presidente di hunta di comisario sr. Dubero tabata tey presente. Aruba Port Devolopment N.V. lo bay keda encarga pa maneha henter e proyecto di Port City.
Manera ta conoci Gobierno di Aruba y Aruba Ports Authority (APA) recientemente a lansa oficialmente e proyecto di Port City. Esaki ta pa desaroya henter e area unda antes tabata e waf di container na Oranjestad, e area aki a bira disponibel na momento cu a muda e waf di container pa Barcadera. E mandatario a duna di conoce cu desde aña 2017 e ta trahando hopi di serca cu APA pa haci tur e trabou y preparacionnan necesario pa e proyecto aki por wordo realisa.
E proyecto di Port City ta uno hopi ambicioso y grandi pa Aruba, e lo bay genera hopi cuponan di trabou durante un periodo di 15 aña. E ta bay genera hopi entrada pa APA y Gobierno y lo crea un spin off economico grandi pa pais Aruba. E ta un proyecto cu tin un inversion di sector priva di 1 biyon florin. Entradanan cu lo wordo genera for di sector priva APA lo inverti bek den infrastructura, caretera, landscaping, boardwalk, parkenan publico y mantencion di esakinan durante di 60 aña.
Minister Oduber a indica cu esaki ta e modelo financiero di Port City y naturalmente pa maneha e proyecto importante aki mester a funda un compania nobo. Dialuna tabata un dia grandi pa Aruba caminda finalmente despues di hopi preparacion e compania Aruba Port Devolopment N.V. a keda funda na un Notario conhuntamente cu director di APA y presidente di e Hunta di Comisario.
Aruba Port Devolopment N.V. lo ta e compania cu lo bay ta encarga pa maneha henter e proceso di destaho publico cu lo cuminsa pronto. Awor tur e trabounan por sigui segun e planificacionnan pa asina e proyecto di Port City por ranca den e Segundo cuartel di aña 2023.
