Riba djasabra 11 di febrüari 2023 Tourism Corporation Bonaire (TCB) a selebrá yegada di Delta Air Lines ku un saludo di awa den kuadro di e 15 aña ku e kompania aéreo ta bula for di Atlanta pa Boneiru. E logro importante akí a duna un aporte importante na Boneiru su turismo. TCB ta rekonosé importansia di Delta Air Lines komo partner instrumental pa e industria akí.
TCB a yama tur e bishitantenan ku a yega bon biní ku un ‘goodiebag’ boneriano komo muestra di apresio ku a keda duná dor di nos Miss Tourism Bonaire, Caroline Porras.
Nan a transformá sala di yegada di Flamingo International Airport i hasié un fiesta kultural ku músika di Kah’i Òrgel i nos Embahadornan di Boneiru bistí den trahe tradishonal folklóriko, pa deleitá i gradisí tur bishitante ku a yega.
TCB a organisá tambe un seremonia bou di e título #itsinournature pa e tim di Bonaire Air Handling Services i Delta Air Lines den Tecno Bar pa gradisí nan pa nan dedikashon durante tur e añanan akí.
“Nos ta orguyoso ku e logro akí i ku e kolaborashon ku Delta Air Lines. TCB ta aploudí sosten di e stakeholdernan den sektor públiko-privá durante e 15 añanan tras di lomba i nos ta spera un dékada mas di kolaborashon ku Delta Air Lines’, segun Miles B M Mercera, direktor di TCB.
