Crecemento di poblacion ta grandi y pa 2030-2050 Aruba ta den problema serio den mundo social

Presidente di fundacion Alzheimer Aruba Melva Croes Yaniz ta kere cu Aruba mester pone atencion den termino di 20 aña mas. Actualmente e poblacion di Aruba ta creciendo grandemente y pa aña 2030 Aruba ta den problema serio y pa 2050 si situacion mester keda asina aki e lo ta un desaster.

E situacion ta preocupante y no ta bay tin hende pa yuda cuida cu e personanan cu problema cu trastorno Neurocognitivo y nos adultonan mayor. Antes e situacion tabata diferente e ultimo yiu muhe den famia mayoria bes ta esun cu ta cuida e mayornan, na mes momento e yiunan homber ta prefera di pone nan ser keri den luganan di cuido debi cu hopi biaha e yiunan homber ta sinti cu esey no ta nan tarea.

Aki ta e sistema di machismo cu ta drenta y e parti aki tambe lo ta un situacion fastioso na momento cu e envehecimento tuma luga y Aruba mester ta hopi cauteloso con nos sistema di cuido den su totalidad ta prepara pe.

Segun Presidente di fundacion Alzheimer e maneho social ta laga hopi di desea y aki 20 aña no ta mira cu lo e ta bay ta algo bunita. Desde aña 60 Aruba a importa hopi hende pa bin Aruba, e edad den e tempo ey ta mas of menos entre 20 aña y nan a keda Aruba y nan ta e poblacion na e momentonan aki cu ta den pension, esaki sigur ta un peso pa nos sistema di cuido.

Banda di esaki ta haya cu mester paga e specialistanan y e mediconan hopi placa. E pregunta ta keda si ta bay tin placa pa cuido di nos grandi nan aki 50 aña?. Tambe ta mira cu tin un desaroyo cu ta tumando luga unda cu robot lo bay tuma over , pero realmente e robotnan aki tambe lo bay costa hopi placa y hende lo no por ni bay paga pa nan.