Durante un conferencia di prensa reciente, lider di fraccion di MEP, Sra. Evelyn Wever-Croes, a expresa su preocupacion pa e direccion cu e maneho di turismo ta tumando. El a señala cu e Minister di Turismo a firma un contract relaciona cu maneho di desperdicio, desviando di e tema central cu realmente mester wordo debati cu e minister aki.
Sra. Wever-Croes a enfatisa cu e discusion riba con pa mantene Aruba limpi y maneha sushi ta cay bou di responsabilidad di e Minister encarga cu Desperdicio, Sr. Arthur Dowers. Pa e fraccion di MEP, e debate principal cu e Minister di Turismo mester ta unda e sector aki ta bayendo y ki direccion e turismo di Aruba mester tuma pa e proximo añanan.
Impacto di turismo y e reto di overtourism
Sra. Evelyn Wever-Croes a subraya e necesidad urgente pa papia abiertamente riba e presion cu turismo ta eherce riba nos infrastructura, naturaleza, playanan y trafico, y e mas importante, riba e calidad di bida di e pueblo di Aruba. Banda di esaki, e lider di MEP a enfatisa cu mester atende debidamente cu e señalnan di overtourism y e preocupacion creciente di ciudadanonan cu ta sinti cu Aruba ta yegando na su limite, caminda e bienestar y e interes di e comunidad no semper ta ricibi e prioridad cu nan merece.
Durante Gabinete Wever-Croes II, Aruba a scoge e vision di High Value, Low Impact, un modelo diseña pa genera mas balor economico cu menos impacto negativo riba nos isla, protehando e medio ambiente y fortaleciendo e bienestar di e comunidad. Segun e lider di MEP, awor ta e momento pa e Gobierno AVP-Futuro duna claridad si e vision aki ainda ta guia e maneho actual, of si a lag’e atras.
Sra. Wever-Croes a agrega cu maneho di desperdicio ta un responsabilidad importante, pero e minister encarga cu e cartera ey mester duna cuenta riba su resultadonan. Mescla responsabilidadnan entre diferente ministerio no ta refleha bon gobernacion ni ta crea e claridad cu e pueblo merece.
Un yamada pa un debate profundo pa futuro di nos turismo
Den nomber di Fraccion di MEP, Sra. Evelyn Wever-Croes a haci un yamada pa tene un debate publico, profundo y serio cu e Minister di Turismo, dedica na e futuro di e sector aki. E discusion mester enfoca riba tres pregunta fundamental:
*Proteccion di e isla: Con nos ta proteha Aruba pa e proximo generacionnan?
*Sosten di e pueblo: Con nos ta mantene e apoyo y e respaldo di nos comunidad pa cu turismo?
*Crecemento responsabel: Con nos ta logra un crecemento economico cu ta bay man den man cu sostenibilidad y un miho calidad di bida?
Sra. Wever-Croes a conclui cu turismo ta e motor principal di nos economia. Precisamente pa e motibo aki, nos tin e deber di tene un debate serio cu e minister encarga cu e cartera, pa asina establece un vision cla pa futuro di Aruba.