Un profeta nunca no ta reconoci den su propio Pais. Ex Minister di enseñansa di Antias Glenda Richardson tabata minister di Saba y St.Eustatius den e prome gobierno despues cu Aruba a sali for di constelacion di Antias, pero sra. Glenda tabata biba na St Maarten e tempo ey.
Mr Johnson di Saba a pidi Sra. Richardson pa representa Saba y St Eustatius. Tabata temponan bunita y experiencianan unico. Na momento cu e yega St Eustatius e gezaghebber di e tempo ey cu tabata di Surinam a laga sa na momento cu Sra. Richardson a bira mandatario pa no bin cu Ingles na St Eustatius paso nan no kier Ingles.
Asina a bay bestuurs college y aki tambe e diputado nan di St Eustatius cu no tabata por a papia ni Ingles y ni Hulandes bon a vocifera na sra. Richardson pa e no bin cu Ingles na St Eustatius. E atakenan a bin directamente mirando cu Sra. Glenda Richardson ta conoci como linguista cu tabata lucha pa lenga materno di e pais pa ta den enseñansa. Sinembargo sra. Richardson a dicidi cu e lo no pleita cu ningun hende pero si a percura hunto cu gezaghebber di Saba pa Ingles keda introduci na Saba si.
Na momento cu esey a sosode e comunidad di Saba tabata hopi contento mirando cu por a experencia cu no tabatin cantidad di muchanan mas cu ta cay afo of muchanan cu ta keda ripiti klas. Segun Sra. Richardson tabata increibel cu tin muchanan di eerste y tweedeklas ta ripiti klas door di e Hulandes, pero ora nan a cuminsa bay scol na Ingles e exito tabata increibel pa Saba y St Eustatius a keda atras unda cu muchanan a keda cu dificultad pa studia.
Sinembargo awendia cu St Eustatius ta forma parti di e islanan BES e Hulandes nan a ripara con malo e muchanan ta na scol na St Eustatius nan tambe a manda haci e mes un investigacion cu sra. Glenda Richardson a haci y nan a yega na e mes un conclusion cu Ingles mester bin na St Eustatius tambe y pa awo ya e cambionan a tuma luga unda cu e Ingles ta na St Eustatius awo den enseñansa y no Hulandes mas cu e gezaghebber di Surinam di e tempo ey a exigi pa tin Hulandes na St. Eustatius.
Sra. Richardson ta lamenta cu e mes un investigacion cu su persona a haci a conclui cu scolnan na St Eustatius mester ta na e lenga materno pa tin exito, pero lamentablemente no a scucha di e tempo aya, paso por a scapa hopi studiante. Sinembargo Sra. Richarson ta contento mirando cu e la biba pa mira con Ingles a keda introduci na St. Eustatius tog aunke cu na prome instante nan no kier a acepta.
Door di e investigacion cu sra. Richardson a haci ya caba tabata bon cla cu e lenga materno di e Pais cu ta Ingles mester a keda introduci na scolnan y tabata imposibel cu e muchanan lo mester a studia na un lenga cu nunca nan no a tende. Sra. Richardson ta sumamente contento cu e ta na bida di por a mira e cambio aki.
Mirando cu e semper sra. Richardson a sigui e desaroyonan di Saba y St Eustatius e ta sumamente contento y un di e dianan cu mester a bay traha pa tolk na st Eustatius e la acerca diputado Henriquez a confirma cu nan a pone e idioma materno como e prome idioma den enseñansa na St Eustatius cu awe tin hopi mas bon resultado di e muchanan na scol.
Sinembargo ex minister di enseñansa Glenda Richardson ta lamenta cu no a scucha di dje prome y a hunga politica y esunnan cu a paga ta e hobennan di e tempo ey, pero awo algun di e hobennan aki ta wordo salba mirando cu hopi a bay perdi.
Mirando e experencia aki e Arubiano ex minister di enseñansa na Saba y St Eustatius ta conseha cualkier gobierno pa stop di hunga politica cu e pueblo. Nos islanan tin hopi talento y nos por haci hopi cos pa e islanan pero hopi biaha na e islanan tin hopi politica ta wordo hunga. Ta como un vak minister por a ripara con politica ta wordo hunga y por stroba hopi desaroyo di un Pais.
Tambe ta hopi importante cu mester bin cu programanan di conscientisacion mirando cu ta imposibel cu mas cu 40 aña pasa a lucha pa lenga materno wordo duna den enseñansa y awe ainda despues di mas cu 40 aña na Aruba aki ta bolbe tende e mes un cos cu a tende 40 aña pasa y den tur e aña nan esunnan cu ta wordo perhudica ta e muchanan, hobennan studiante.
Pesey mes e conscientisacion mester bin y gobernantenan mester reconoce cu tin un problema na scol y si mester sigui asina lo mester bin un total reformacion den enseñansa. Tambe loke cu ta hopi importante ta cu nos mester wak ki tipo di sociedad nos kier y pa kico tin mester di Hulandes.
Segun ex minister di Antias, e idioma economico di Aruba no ta Hulandes pero Ingles e ora mester por pensa den direccion di un tweetalig onderwijs papiamento/Ingles. Ta bon cla cu Hulandes no ta e idioma di economico na Aruba y cu Hulandes ta e di tres idioma cu ta wordo uza na Aruba. Esaki ta pone cu ta importante pa pone atencion na e prome y di dos idioma di e pais den enseñansa.
1 comment
[…] Source link […]