Cft: “Ancra e mehoracion”

Colegio Ehecutivo di Boneiro ta enfrenta e tarea importante di integra e mehoracionnan realisa riba tereno di maneho financiero structuralmente dentro di organisacion di e entidad publico. Riba esey Colegio di supervision financiero di Boneiro, Saba y Sint Eustatius (Cft) a enfatisa den su combersacion cu Colegio Ehecutivo di Boneiro. Refuerso di poder di ehecucion ta un tema crucial den esey. 

Boneiro a tuma algun paso importante den e ultimo añanan pa mehora maneho financiero. E esfuersonan di e entidad publico a keda corona na cuminsamento di e aña aki cu un declaracion aprobatorio di accountant di e cuenta anual corespondiente na aña presupuestario 2022. Cft a anima Colegio Ehecutivo pa reforsa e funcion financiero den ful e organisacion pa garantisa mantencion di e declaracion aprobatorio.

Akinan Cft a expresa su preocupacion pa e limitacionnan den e poder di ehecucion di e entidad publico. E limitacionnan ey ta refleha tambe den ehecucion di presupuesto di 2023. E cifranan di realisacion di prome semester di 2023 ta mustra cu Boneiro ta bayendo un biaha mas pa un surplus, mientras cu e presupuesto aproba tin un deficit como punta di salida pa 2023.

Proyecto presupuestario pa 2024

Cft a trata tambe e proyecto presupuestario pa 2024 cu Colegio Ehecutivo. Cft a observa cu satisfaccion cu Boneiro, despues di varios aña presupuestando deficit, a presenta un presupuesto plurianual balansa. Den opinion di Cft, e forma con Boneiro ta calcula onderstand special (bijzondere uitkering) den e presupuesto ta sigui ta un punto importante di atencion. Boneiro ta inclui solamente onderstand special structural den e presupuesto y door di esaki e presupuesto no ta ofrece un imagen exacto di tamaño real di e presupuesto. Esey no solamente ta limita capacidad di e presupuesto pa duna direccion, sino tambe e funcion pa fihamento di cuadro door di Conseho Insular na momento di aproba e presupuesto.