Durante di e ceremonia di entrega di premio di Playa Film Festival 2023, Addonsito Croes a presenta y honra sra. Luty Martines, na nomber di Fundacion CineAruba, cu un bunita galardon dedica na su 40 añanan den e mundo di Teatro y Cine na Aruba. Ludmilla Henriette Martinez, miho conoci como Luty, a cuminsa 40 aña pasa den e mundo di e arte di teatro. Durante 40 aña el a traha riba escenario- y pantayanan importante di e mundo di actuacion na Aruba, Corsou, Boneiro, Saba y St. Maarten. Su prome rol, 40 aña pasa, tawata “Mrs Sullivan” den e obra di “Un trabao Milagroso” di Mascaruba.
Tanto Addonsito como Juan Pardo a felicita Luty deseando e tur exito y salud di mundo. Cu hopi emocion Luty a ricibi y gradici CineAruba y tur presente pa e honor grandi aki ricibi. Su pensamento ta y lo keda: “Cu of sin budget, produci toch”.
