Tourism Corporation Bonaire (TCB) i Fundashon Nawati ta organisá e último Bario Festival pa aña 2023 ku ta tuma lugá den bario di Nort‘i Saliña . E evento ta tuma lugá riba djasabra 9 di desèmber 2023 den un tremendo ambiente for di 5 or di atardi te 12 or di anochi.
E programa ta kargá ku músika i tin stènt ku ta bende kuminda lokal. Agrupashon Musikal Grupo Krioyo Kunuku Boyz, Gaitas los Cañonasos i Equal Right and Justice ta presente pa animá e anochi akí. Pa duna e Bario Festival un toke mas spesial lo bai tin grupo Maskarada, Dj Toad i hopi mas. E Bario Festival ta tuma lugá riba e vèlt na Sentro di Bario Nort‘i Saliña. Entrada ta kompletamente grátis.
TCB i Fundashon Nawati kier ekstendé un invitashon na pueblo di Boneiru i tambe na tur nos bishitantenan pa bin pasa un ratu ameno huntu ku nos riba djasabra 9 di desèmber den e último edishon di Bario Festival ku ta tuma lugá den bario di Nort ‘i Saliña.
