Dia 5 di December Joselin Croes a cuminsa cu su trabao como director di Arubahuis. Na su yegada ela keda saluda door di r PR di Arubahuis Sidney Kock y demas personal di Arubahuis. E tabata un momento ameno entre e team di Arubahuis y e director nobo.
Joselin Croes a keda apunta como director door di un comission di Gobierno cu a guia e proceso di solicitud pa un director nobo pa Arubahuis.
Joselin Croes prome cu e funcion di director di Arubahuis, tabata Minister Plenipotenciario pa Aruba na Washington DC. Durante di e periodo na Washington Joselin a dedica su mes na promocion y pa crea oportunidad pa Aruba y Arubianonan cu partnernan na Merca. Esaki cu un enfoke particular riba e tereno di relacion economico y diplomatico, desaroyonan sostenibel, innovacion, educacion y cultura.
Prome cu Joselin a asumi e funcion di Minister Plenipotenciario na Washington ela traha como Chief of Staff na e Ministerio di Husticia, Seguridad y Integracion. Entre 2010 te 2017 Joselin a traha como abogado na Aruba. Prome cu abogacia Joselin tabata director di Benta y Mercadeo pa Lotto pa Deporte.
Na 2021 Joselin a logra su Master den Environmental Management na Universidad di Maryland Global Campus y tambe un Master den Ley na Universidad di Aruba. Na Intercollege na Den Haag Joselin a logra su Bachelor den International Business Management and Public Relations.
E potretnan ta cortesia di Arubahuis