Tourism Corporation Bonaire (TCB) a kompletá su Plan di Akshon pa 2024, komo kontinuashon di e direkshon stratégiko ku e Plan Maestro pa Turismo di 2017 i e plan di akshon di tres aña di 2023 a establesé. E plan nobo akí ku TCB ta kompartí, tin komo meta pa promové un sektor turístiko sostenibel i bon balansá na Boneiru, kaminda ta rekonosé e kontribushon konsiderabel di turismo na e Produkto Interior Bruto (PIB) i na empleo di nos isla.
E Plan di Akshon 2024 ta enfoká riba e tema “Tesorá patrimonio, kultura, naturalesa i turismo”. E ta enserá strategianan pa eduká i inspirá nos bishitantenan, pa ehekutá turismo basá riba komunidat, pa reposishoná Boneiru komo un destinashon di biahe prominente i sostenibel, pa diversifiká e merkado, pa oumentá loke turista ta gasta, pa atraé e públiko adekuá i pa mehorá nivel di nos servisio. E plan ta marka tambe un kambio den aserkamentu di TCB di merkadeo tradishonal pa maneho di destinashon i merkadeo integrá, kaminda e énfasis ta riba protekshon di medio ambiente, patrimonio kultural i bienestar di komunidat. Den kolaborashon ku su stakeholdernan e tim di TCB ta dediká su mes na ehekushon di e plan akí i na fortifikashon di Boneiru su posishon riba tereno di biahamentu sostenibel.
A entregá e promé ehemplar di e Plan di Akshon 2024 na diputado di Ekonomia i Turismo, señor Clark Abraham, i na e stakeholdernan manera BONHATA, BIA i BHM.
