Si nos sa cu algo ta malo y nos keda keto y lage sosode nos ta complice, si un mayor ta na altura cu un cuminda ta daña y toch e ta laga su yiu come e cuminda, e mayor ey ta un piedra di trompica pa su yiu, pasobra e mes ta causante di dolor pa su yiu,
Tur ley ta pa proteha e pueblo contra maldad, di proteha e pueblo pa bay contra boluntad di Dios. Pesey mes 10 mandamiento a wordo introduci den pasado y cu te e dia di awe nos mester tene cuenta cu locual Dios a prohibi,
Pero mirando e manera con maldad , inmoralidad, y malicia a drenta mundo y ta creciendo, nos por bisa cu nos ta bibando den tempo ,manera Noe , caminda pensamento di e hende tabata continuamente riba maldad.
Pesey Dios ta spierta nos den Isaias 5:20 bisando: Ay di esnan cu ta yama loke ta malo bon, y loke ta bon malo.Loke ta scuridad lus y loke ta lus scuridad. Loke ta marga dushi y loke ta dushi marga.
Ay di esnan cu ta sabi den nan mes wowo, y prudente den nan mes bista.
Den un palabra bisa ay di esnan cu ta coopera cu maldad y inmoralidad, cu ta legalisa abominacion, cu ta haci manera Dios no ta existi, pa asina nan haci locual cu nan kier, y nan ta lubida cu tur maldad tin nan consecuencia.
Ta masha facil pa laga hende tuma decision robes pa nos, y despues bisa ta nan a hacie, no ta nos a hacie y e ta keda manera un homber cu a comete adulterio, y despues ta bisa su yiunan cu ta nan mama a pidi divorcio y cu e no a haci nada.
Tur locual hende haci, sabiendo e berdad toch ta sigi boluntariamente den e boluntad di inmoralidad , rechasando Dios, pa asina agrada nan capricho, tin consequencia di e furia di Dios.( Romanonan 2:5).
No laga ningun hende gaña nan mes, pasobra ningun hende no por gaña Dios.
Tin hende cu mente malvado cu ta venga nan propio famia, y perde tur cos.
Tin hende cu nan mes ta duna na yiu ok pa usa droga.
Tin hende cu ta apoya nan yiu pa cana cu arma, pa asina e ta prome cu ta tira.
Tin hende cu ta aplaudi nan amigo of amiga den adulterio.
Tin hende cu ta pusta ken por bebe mas, sin corda e consequencia di stuurmento burachi.
Tin hende ta aplaudi un mucha muher soltero cu tin relacion cu un homber casa.
Tin hende cu ta aplaudi un mucha homber soltero cu tin relacion cu un muher casa.
Tin hende ta sostene maldad y inmoralidad pa nan haña fama.
Tin hende asina envidioso cu ta pensa cu nan lo crece kibrando otro.
Tin hende cu ta pensa cu nan placa nan por manipula tur asunto.
Tin hende ta kere cu Dios no ta existi y despues di morto no tin nada mas.
Pero Dios den su inmenso amor ta desea pa tur hende wordo salba ( Juan 3:16) y pa ningun hende cay den condenacion, pero tin hende mes ta scohe pa condenacion door di rechasa Cristo Hesus. Dios kier pa nos tur yega na e conocemento di e berdad.
Mi pueblo ta perece pa falta di conocimento. Ora hende no tin conocemento ,Cristo Hesus ta duna conocemento, pasobra e enemigo ta cla para ey banda pa cohe bentaha, cu maldad.
Dios duna nos sabiduria pa para contra maldad y inmoralidad.