Conforme e decreto nacional cu ta establece medidanan general di 29 di augustus 2023, y den
cual ta stipula normanan tocante e derecho di asistencia logopedico, entrante 2 di september
2023 logopedia a keda concretisa den e cobertura di seguro AZV. Esaki ta un derecho tanto pa
mucha como adulto. Logopedia ta e tratamento pa recupera, mehora of mantene e
funcionamento di oido, bos of organonan di papia. Adicionalmente logopedia por yuda cu e
halamento di rosea y ora tin problema pa come, bebe of guli.
Trayecto di negociacion
Tabata den e ultimo kwartaal di 2023 cu OE AZV a informa tur asegurado cu lo drenta un
trayecto di negociacion cu e logopedistanan. Dentro di e trayecto di negociacion a evalua
continuamente e stipulacionnan di e Ley AZV incluyendo e forma con OE AZV lo ehecuta esaki.
Tambe a tene cuenta cu e puntonan di atencion treci dilanti door di e propio logopedistanan.
Contracto y procedura
Hunto a keda cla y entrante 1 di juni 2024 ta ehecuta e derecho riba logopedia. E ta nifica cu ora
bo dokter di cas of specialista haya cu ta necesario; e por referi bo pa tratamento cerca un
logopedista. Bo dokter di cas of specialista (= specialista KNO, specialista di mucha, neurologo,
specialista di rehabilitacion, specialista di adulto mayor y den algun caso limita e specialista di
pulmon y of e specialista di stoma, tripa y higra) ta manda -digitalmente- e formulario di peticion
pa e logopedista. E logopedista na su turno ta yena e datonan cu falta den e formulario di
peticion y ta manda e peticion pa OE AZV. Una bes OE AZV ricibi e (formulario di) peticion, ta
evalua esaki y tuma un decision.
Aporte propio
Pa cuido di logopedia ta existi un aporte propio di 10% di e tarifa. E aporte propio di 10% ta
wordo paga na cada sesion y directamente cerca e logopedista. Conforme contracto e aporte
propio di e asegurado ta Awg. 7,50 pa un sesion di 30 minuut of Awg. 15,00 pa un sesion di 1
ora.
Tratamento
E tratamento por wordo pidi pa e siguiente casonan: deficiencia auditiva y deterioro di e funcion
auditiva, trastorno di bos, trastorno di idioma, trastorno di articulacion, nasalidad, trastorno den
e fluidez y ritmo di papia y comportacion anormal oral. Pa duna algun ehempel. Un persona cu
tin e malesa di Parkinson y dokter di cas ta wak cu lo tin mester di ayudo di logopedia. Of un
persona cu ta cay bou di spectrum autismo. Of un persona cu a haya un atake celebral (“stroke”)
y mester siña papia of guli bek.
Kico no ta wordo cubri?
Segun ley AZV no por duna permiso pa e tratamento si e ta; innecesariamente caro, complica of
inefectivo. Tampoco por aproba tratamento pa dislexia, discalculia y otro trastorno di
siñamento, desaroyo di idioma relaciona cu dialecto of otro idioma y terapia di musica.