Partido Movimiento Electoral di Pueblo ta un partido prestigioso, y responsabel. Nos a demostra cu – apesar di tur cos – nos a goberna e pais aki pa e ultimo 7 añanan, atravesando e peor crisis di historia moderno di nos pais y hiba Aruba na un recuperacion impresionante. Movemento Electoral di Pueblo semper a tene su mes na palabracion, y ta conta cu nos partner den gobierno tambe haci esey.
No por ta asina cu sin duna motibonan valido, ta bin cu exigencia contrario na e acuerdo entre partidonan.
Si acepta awor, kico ta e siguiente? Cu MEP mester cambia su lider di fraccion pasobra parlamentario di Raiz no ta gust’e (pasobra esey tambe nan a bisa). Of mester cambia minister presidente, pasobra e parlamentario no ta gust’e?
Gobernacion ta algo serio. Pueblo a pone su confiansa den nos pa goberna y trece progreso y bienestar. Nos a traha palabracionnan. Ta lamentabel cu pa capricho di un parlamentario, RAIZ ta kibra e acuerdo y e base pa un gobierno solido. Gobernacion ta algo serio. Y partido RAIZ a demostra di ta dictorial pa nan kier algo cu no ta existi na Aruba, pero na pais nan bisiña. Aruba no por permiti tipo di politica nan dictatorial haya forsa pa biba na Aruba mane Venezuela of Cuba.