Awe e caso ‘New York’ a wordo trata den Corte den Prome Instancia. Ta trata un caso penal contra e
periodistanan R.L., B.K., N.G. y N.C.d.A. E sospechosonan aki ta wordo acusa di corupcion activo di un
funcionario publico, di complicidad den violacion di secretonan oficial di trabao y di participacion na un organizacion criminal durante e periodo di prome di januari 2021 te 22 di maart 2023.
E tratamento di awemainta ta un continuacion di e caso contra e agente policial V., kende a wordo
condena riba 8 di december 2023 pa 16 luna di prison, di cual 8 ta condicional, pa malversacion,
violacion di secretonan oficial di trabao, abuso di su funcion y soborno di parti di miembronan di prensa.
V.a wordo ademas prohibi di eherce e trabao di polis pa e duracion di 3 aña. Ministerio Publico a bay den apelacion contra e sentencia aki. V. a laga e sospechosonan seducie na comete hechonan castigable. E caso aki ta tira luz riba e otro banda di corupcion.
Cualkier persona cu comete hechonan castigable por wordo persigui. Periodistanan tin cu tene nan mes na ley. Si un periodista viola ley, e tambe por y mester wordo persigui y condena.
Soborna un polis structuralmente no tin nada di haber cu eherce libertad di prensa periodistico. Debi na nan comportacion robez e sospechosonan a haci cu V. a bergonza e confianza especial poni den dje como polis.
El a crea riesgo tambe, no solamente pa agentenan policial, sino tambe pa servicionan di emergencia,manera ambulance y bombero. Scondi scondi e sospechonan a sinta scucha trafico di comunicacion via portofoon y di e manera ey a viola privacidad di ciudadanonan di Aruba. Ministerio Publico ta tuma nan esey hopi na malo.
Fiscal a pidi un castigo di prison incondicional di 24 luna contra e sospechoso C.d.A. Ademas fiscal a pidi pa e wordo hiba cera mes ora ora di dicta sentencia. Contra e sospechosonan L. y G. a exigi un castigo di prison di 18 luna, di cual 8 luna ta condicional, cu un tempo di prueba di 3 aña. Contra e sospechoso K. a pidi un castigo di prison condicional di 6 luna, cu un tempo di prueba di 3 aña y 240 ora di trabao pa comunidad. Huez lo cera e investigacion y lo dicta sentencia riba 18 di december riba 2024 pa 8.15’or di mainta.