2 di september 1952 – 19 di februari 2025
Ministerio di Cultura y Departamento di Cultura Aruba ta lamenta profundamente e fayecimento
di Roland Narcisio Kock, miho conoci como Chicho. Cu su fayecimento, Aruba ta perde un gran
baluarte den musica: un bahista, compositor y cantante cu a dedica su bida na arte musical.
Bida Personal
Roland Narcisio Kock a nace dia 2 di september 1952 na Weg Sero Blanco y despues a muda pa
Weg Sero Preto. Su tata yama José Maria Kock (†) y su mama Maria Kock. Nan tabata ocho
ruman y Chicho mes tabata di cinco ruman. Aunkue nunca ela casa, e ta tata di cuatro yiu muhe:
Yahaira Jundru, Kini Kariana Kock, Katleen Carien Kock y e mas chikito, Narisma Roulien
Kock. Den su famia tabatin mas musico, incluyendo su ruman mayor cu tabata tocado fio,
trompetista y cantante. Desde chikito, Chicho tabata conoci pa su apodo "Chicho el Feo", pero despues “el Feo” a bira un recuerdo di pasado y e a keda simplemente Chicho.
Musica: Su Bida y Pasion
Chicho semper a considera su talento musical como un regalo di Dios. Musica tabata su pan di
cada dia; cada cen cu el a gana tabata bin di su arte. Desde chikito, el a desaroya un gran amor pa
musica y su carrera a crece constantemente. Su prome contacto cu musica: Aña 1963 na edad di
11 aña, Chicho a cuminsa toca steelpan den banda The Invaders. Na e principio, el a practica
guitara, pero eventualmente el a cambia pa baho, cu a keda su instrumento principal. El a toca
den Jumping Jewels hunto cu Ronnie Kock, participando na hopi competencia y siñando hopi
cos di musica. Ademas di baho y guitara, el a domina drum, conga, timbal, cuatro, tambu, wiri y
otro instrumento di percusion.
Trayectorio Musical
Den su bida artistico, Chicho a traha cu hopi banda y artista renombra, manera Sensacion del
Caribe (banda principal cu el a toca durante 9 aña), Grupo musical den Hulanda (Killing
Ringelings – baho, timbal y conga), Musical Time (7 aña hunto cu Edwin Abath y Hildward
Croes (†) y Pride (grupo cu el a yuda lanta y tabata su ultimo banda oficial). Den e Festival di
Tumba, Chicho a participa 39 biaha, di cual 36-37 biaha el a yega finalista y a bira Rey di
Tumba 4 biaha na 1985, 1997, 2001 y 2004. Su tumba mas conoci ta "E Burico" y otro exito
tabata "Pal’i Coco". E hit grandisimo "Keda So" a bira un clasico, e ta graba na 1986, cu tambe
ta un composicion y canta di Chicho mes.
Ademas, Chicho tambe a traha cu Hector Lavoe y Willy Colon, cu kende el a toca na Bonaire
Club. Ademas di musica, Chicho tambe tabata un fiel amante di Dragrace y tabata driver di “E
Gago”.
Logronan Internacional
Chicho a trece su talento pa diferente skina di mundo, manera Colombia cu Sensacion del
Caribe, na Venezuela cu Pride, den show Sábado Sensacional, na Punto Fijo, presentando den e
Campo di Shell como “open act” pa Fantasma del Caribe y Europa.
Conseho pa e Hobennan di Musica
Chicho a concidera disciplina y dedicacion como clave pa exito musical. Su mensahe cu e ta laga
atras pa e hobennan di Aruba ta: Sigui bo pasion, pero wak pa semper bo ta na ora y traha na un
nivel profesional; tuma bo trabou di musico serio y mustra cu bo por haci miho; bo no mester
depende di mashin; si bo por toca “live”, bo tin mas balor como artista; studia bo instrumento of
perfecciona bo talento natural; y, sin duda, musica no ta un trabou facil, pero cu pasion y
dedicacion, bo por logra cosnan grandi.
Legado di un Artista Berdadero
Roland Narcisio "Chicho" Kock lo keda pa semper den e historia di musica Arubano. Su talento,
su entrega y su pasion lo inspira generacion tras generacion.
Ministerio di Cultura y Departamento di Cultura Aruba ta extende su condolencia na su sernan keri,
yiunan, famia, musico-, amigo- y conocirnan. Aruba ta honra su legado y su musica lo continua
vibra den nos curazonnan.
Cu Chicho descansa na paz.
