“Masha danki pa e oportunidad di por a sirbi Aruba como bo Prome Minister y cu Dios bendiciona cada ciudadano di nos pais”
Diahuebs mainta 27 di Maart 2025, Prome Minister Evelyn Wever-Croes tabata den Parlamento na unda el a tuma e oportunidad di anuncia e retiro di Gabinete Wever-Croes II y duna gradicimento na tur esnan cu di of otro manera a duna gobierno e sosten pa goberna den e ultimo 7 aña y mei.
Prome Minister ta gradici henter pais Aruba pa a dun’e e oportunidad pa goberna e pais aki, tur su coleganan minister di Gabinete Wever-Croes I y II, tur medionan di prensa pa a haci posibel pa e mensahe yega caminda e mester yega, Parlamento cu semper tabata habri pa atende e gabinete, tur esnan cu a traha cu e gabinete, y tur hefe di departamento pa nan cooperacion. Principalmente e mandatario ta gradici cada ciudadano di pais Aruba, pa a permiti su persona di ta nan Minister President den e ultimo 7 aña y mei y pa por a representa cada un di nan na Aruba y den exterior, y cu awe hunto nos por mira atras riba logronan grandi.
E mandatario a indica cu berdad Gobierno no a logra tur locual nan a propone nan mes, pero nan a logra cosnan grandi den e temporada mas dificil cu e pais aki a pasa aden, den historia moderno di pais Aruba.
“Mi ta kere cu e resultadonan ta papia pa nan mes ya cu nan ta wordo reconoci pa instancianan internacional y local y pa institutonan internacional financiero cu ultimo a bolbe “upgrade” Aruba. Y manera un señora di Paradera a bisami; “Mi yiu bo a haya e pais cu un MEGA DEBE y bo ta bay lague cu un MEGA SURPLUS” di cual mi a respond’e cu esaki ta hacimi MEGA ORGUYOSO. Y esaki ta e legado cu nos ta laga atras. Mi tin un relato annual di mi ministerio di cada aña cu ta pone e legado aki graba den historia y no por bay perdi
Mi kier felicita tur e Parlamentarionan nobo cu a caba di huramenta y esnan cu lo mester huramenta ainda hopi exito, y hopi sabiduria. Mi kier desea e gobierno nobo hopi sabiduria y exito y cu ohala boso por wordo guia na pone e interes di pais Aruba semper na prome luga paso ta asina so por garantisa un bon gobrernacion.
Nos pais ta un pais bendiciona, Dios tin plannan grandi pa Aruba y loke nos mester haci ta tin fe, traha duro y sostene otro, paso nos a demostra durante pandemia cu uni nos por logra hopi.
Nos ta preparando un traspaso debido di Gabinete Wever-Croes II na e Gabinete nobo. Cada minister a prepara su traspaso cual ta hacimi hopi orguyoso, paso asina bo ta demostra cu bo a goberna na drechi y bo ta sali na drechi. Masha danki pa e oportunidad di por a sirbi Aruba como bo Prome Minister y cu Dios bendiciona cada ciudadano di nos pais” Prome Minister a termina bisando.