E Organisashon di Derecho Humano di Bonaire, den kolaborashon ku e Ministerio Evangeliko di Akshon i e SC Sindikato di Trabou STrAF Divishon Bonaire, Statia, i Saba, a manda un karta di obheshon na Sekretario General di Nashonan Uni Guterres, CARICOM, OECS, OAS, CELAC i COPPPAL denunsiando e karta di provokashon di gezaghebber Soliana ku por kondusi na eskalashon militar I perhudika paz den region di Karibe. E organisashonan sivil siviko ta opone I rechaza firmemente kualke intento pa militarisa Boneiru manera insinua pa gezaghebber Soliano ku no ta skohe pa pueblo pero ku ta nombra I representa Rei I gobierno Hulandes, i ku su akto iresponsabel ta representa un amenasa ku posibel eskalashon i konflikto militar pa Bonaire I region di Karibe.
E pueblo di Bonaire a mantene semper lazonan di amistat historiko ku Venezuela.Hopi di nos hendenan di Bonaire tin desdensia Venezolano, i e komunidat Venezolano na e isla a ko-eksisti na paz ku otro pa generashonnan. E intento di pintá Venezuela komo un amenasa inminente militar no ta solamente infundá, pero tambe ta pone na riesgo un eskalashon inesesario di tenshon den e region.
Nos ta sumamente preokupa ku e karta resien di Gezaghebber Soliano pa gobierno Hulandes, ku ta pidi pa e ministernan di defensa i asuntonan relashon eksterior Hulandes tuma akshon riba lo ke Soliano ta mira komo un amenasa militar di Venezuela. E deklarashon iresponsabel aki ta aumenta temor I paniko bao di e poblashon lokal i por sirbi komo un preteksto pa intervenshon eksterno, inkluyendo posibel interferensia i instalashon di un base militar di NATO na Bonaire. Un akto asina aki lo provoka un konflíktu regional inesesario i pone na peliger paz den Karibe. Si Venezuela reakshona na e alegashon perjurioso den e karta di gezaghebber Soliano, lo por provoka I inisia un konflíktu ku potensial pa eskalá na un krisis global, inkluyendo un guera mundial.
E situashon humanitario di migrantenan Venezolano no mester wordu manipula pa propositonan geopolítiko of militar. Karibe a keda deklará komo un Zona di Paz pa komuninat internashonal inkluyendo Komunidad di Estadonan Latinoamerika i Karibe (CELAC), i presensia di un base di NATO apenas 50 miya for di kosta di Venezuela lo direktamente pone na peliger e stabilidad aki. Aruba i Korsou ku ta mas serka ku Venezuela i ku tin un influensia mayor di migrantenan Venezolano, a rechaza intervenshon militar similar. E aspirashon di gobierno Hulandes pa un base di NATO na Bonaire, unda no tin un krisis signifikativo di refugiadonan, ta plantiá preguntanan serio riba e motibonan real.
Nos ta hasi un yamada riba komunidat internashonal pa apoya nos demanda pa paz i desmilitarisashon. Boneiru i e region di Karibe mester keda liber di intervenshon militar eksterno ku no ta sirbi interesnan di poblashonan lokal.
Nos ta urgi Nashonan Uni i lidernan global pa atende e tema urgente aki i defendé derecho di Bonaire pa keda komo un teritorio pasifiko i desmilitarisá di akuerdo ku ley internashonal