Aruba lo conta cu un atleta mas na Weganan Panamericano Junior
Recien a drenta e grato noticia cu despues di a participa na tur evento clasificatorio unda e la demonstra su nivel, logrando tremendo resultado, atleta di Taekwondo Kyorugi Maelynn Fradl a logra clasifica pa e Weganan Panamerican Junior “ASU2025”. Esaki lo tuma luga na Asuncion, Paraguay den luna di augustus benidero.
Maelynn ta practica e deporte di Taekwondo Kyorugi, cual ta e disciplina di combate. Despues di algun siman di “training camp” na Honduras y Mexico, e la participa den e ultimo clasificatorio pa asina logra cu cupo pa e Weganan. Awo cu e cupo garantisa, Maelynn lo sigi traha duro cu su entrenador Teofilo Rodriguez, pa asina percura pa tin e mas alto rendimento posibel pa e weganan. Di parti di Comite Olimpico Arubano nos ta felicita Maelynn, Teo y Aruba Taekwondo Bond cu e clasificacion aki. #TEAMARU
