Minister di Finansa, Asunto Economico y Sector Primario, Geoffrey Wever, a tene su prome reunion oficial cu Sindicato di Aduana di Aruba (SADA). E encuentro tabata un oportunidad importante pa establece un dialogo directo y abierto cu e representantenan sindical, cu ta defende e interes di e trahadornan den e cuerpo di aduana.
Durante e reunion, a trata temanan clave manera e salarishuis, opleiding y varios otro aspecto di trabou di e duanero. Minister Wever a pone enfasis riba e rol vital cu e cuerpo di aduana tin y a expresa cu e kier un bon relacion cu SADA y ta desea pa tin harmonia den e ehecucion di trabou.
“Pa por logra mehoracion real den proceso y eficiencia, nos mester traha man den man cu e personanan cu ta den e “front lines” tur dia. Mi ta contento cu SADA tin nan porta habri pa colaboracion sincero,” minister Wever a expresa.
E ministerio lo sigui traha den cooperacion cerca cu SADA, e trahadornan y directiva di cuerpo di aduana, pa pone na marcha mehoracion continuo den tur aspecto — di condicion di trabou, te cu eficiencia operacional — pa un sector aduanero fuerte, moderno y comprometi na servicio publico.
