Den cuadro di su bishita oficial na Hulanda, Minister di Husticia di Aruba, mr. drs. Arthur Dowers, a tene un encuentro importante cu sr. Ronald Baarends, Director di Organisacion y Recurso Policial di Hulanda. E reunion ta parti di un serie di dialogo strategico pa fortifica e colaboracion existente entre Aruba y Hulanda den e area di husticia y siguridad.
Durante e reunion, Minister Dowers y sr. Baarends a dialoga riba varios tema crucial, incluyendo:
Cooperacion actual entre e cuerponan policial di Aruba y Hulanda, cu ta basa riba confiansa y intercambio continuo di experencia y conocemento.
Ondermijning, un fenomento peligroso cu ta minando e fundeshi di nos institucionnan y cu mester combati den forma structural y conhunto.
Falta di personal den Landsrecherche, un situacion cu ta crea presion riba investigacionnan y ta rekeri atencion inmediato.
E rol y aporte di RST (Recherche Samenwerkingsteam), un elemento clave den e lucha contra crimen organisa y investigacion den Reino.
Minister Dowers a expresa su gratitud pa e apertura y cooperacion di e autoridadnan Hulandes, y a reforsa su compromiso pa sigui traha man den man riba un strategia comun cu ta pone siguridad y orden publico como prioridad.
E reunion cu sr. Baarends ta reforsa e obhetivo di Gabinete AVP-Futuro pa fortifica nos institucionnan di ley, y pa crea un ambiente mas sigur pa cada habitante di Aruba.