Kuerpo Polisial Hulanda Karibense (KPCN) den kolaborashon ku vários partner di seguridat a tene un akshon dirigí den bisendario di Kaya Maria C. Hellmund-Boom. Durante di e akshon a kontrolá i listra vehíkulo i personanan. Aki a konfiská algun opheto ilegal.
E akshon aki ta relashoná ku e komunikado di Triángulo publiká anteriormente, den kua a anunsiá ku polis lo ta aktivamente komprometé i lo aktua ku sero toleransia den áreanan spesífiko di riesgo di seguridat. Den e akshon riba djamars, KPCN a haña sosten di Cuerpo Policial Aruba (KPA), Kuerpo Polisial Kòrsou (KPC), Koninklijke Marechaussee (KMar) i di e Instituto Hudisial Hulanda Karibense (JICN). KPCN ta ekspresá su gratitut pa e kolaborashon intensivo i efektivo aki.
Alrededor di 5 or di atardi, a para un outo na e kaya menshoná. A detené dos hòmber ku a nenga di kumplí ku òrdu di polis pa listramentu preventivo. Ta trata di un hòmber di inisial D.J.F. di 18 aña di edat i un hòmber di inisial J.B.R. di 21 aña di edat. A bai ku e outo warda di polis.
Den oranan di anochi, e akshon a kontinuá ku sosten di KPC i KMar di kua a tene kòntròl den Nort’i Saliña, Antriol, Amboina i Nikiboko. A kontrolá hendenan riba kaya, na establesimentunan di hóreka i den vehíkulonan den áreanan di riesgo designá.
A detené tres persona pa violashon di Lei di Opio BES. A konfiská entre otro supstansianan probablemente narkótiko, sèn kèsh, arma blanku i un outo. Ta trata di un hòmber di inisial N.M.J.F. di 18 aña di edat, un hòmber di inisial G.R.S. di 62 aña di edat i un hòmber di inisial Q.G.W. di 18 aña di edat. Tur tres detenshon a tuma lugá den e bario di Nort’i Saliña.
KPCN ta rekordá públiko ku polis ta disponé aktualmente di un òrdu formal pa listramentu preventivo den e áreanan di riesgo di seguridat designá. Esaki ta nifiká ku por listra kualke persona ku ta den e áreanan aki sin ku mester tin indikashon i/òf sospecho konkreto.
Nos ta konta ku boso koperashon. Esun ku nenga di koperá ku listramentu preventivo ta kore riesgo di detenshon. Listramentu preventivo ta keda un instrumento den e lucha kontra poseshon di arma i otro echonan kastigabel.
Bo embolbimentu ta esensial pa e efektividat di e medida aki. Bo tin informashon ku bo ke kompartí òf bo ke mèldu un situashon sospechoso? E ora ei tuma kontakto ku polis via 715 8000 òf via e liña di tep anónimo 9310.
