Kolegio Ehekutivo di Entidat Públiko Boneiru a disidí ku for di 4 te ku 6 di sèptèmber 2025 no ta duna pèrmit pa evento grandi òf fiesta komersial.
A tuma e desishon akí relashoná ku selebrashon di Dia di Boneiru, nos fiesta nashonal dia 6 di sèptèmber. Den e periodo akí Boneiru ta enfoká riba e programa ofisial i kultural ku ta forma parti di e dia spesial akí.
Konseho di komishon Dia di Boneiru 2025
E desishon ta konforme konseho di komishon Dia di Boneiru 2025. E komishon akí huntu ku e diputadonan i Konseho Insular a traha un plan di evento. Meta di esaki ta pa sòru pa mas hende partisipá na e selebrashon ofisial i pa redusí preshon riba supervishon i mantenshon di lei.
Aktividatnan na i rònt di Playa
E partinan ofisial di e programa ta tuma lugá na i rònt di Playa, entre otro riba e lugá di stashoná outo dilanti di e edifisio bieu di Kolegio Ehekutivo i den Parke Wilhelmina.
Huntu nos ta sòru pa un selebrashon seif i bunita
Nos ta konta ku komprenshon i koperashon di tur hende, di manera ku nos por sòru pa un selebrashon seif, festivo i signifikativo di Dia di Boneiru. Un momentu pa selebrá nos union i nos kultura.
Pregunta òf mas informashon?
E ora ei tuma kontakto ku departamento di Asuntunan Hurídiko i General (JAZ) di Direktorado di Maneho i Sosten (B&O) via apk@bonairgov.com.