E ekipo di Aruba Tourism Authority (A.T.A.) tawata tin nan reunionnan strategico na New York hunto cu e agencianan di mercadeo cu ta apoya A.T.A. pa delinea y ehecuta strategia pa promove Aruba den e region di Norte America. A repasa diferente estudio pa duna contenido pa plannan pa 2026. A elabora riba diferente tema incluyendo rendimento di turismo y desaroyonan actual di e mercadonan. A comparti estudio di posicionamento pa Aruba como marca den e mercado di Merca y e aspectonan geopolitico y economico di e region a wordo analisa y discuti.
Agencianan a comparti un analisis di competencia riba diferente disciplina di mercadeo, y a duna mas informacion riba tendencianan global di turismo. E data aki ta importante na momento di tuma decisionnan pa 2026. Hunto, a evalua e esfuersonan actual y a identifica oportunidadnan pa innova y mehora e strategia di mercadeo y comunicacion. E topico di turismo responsabel a bin dilanti como parti integral di e diferente combersacionnan como un tema primordial pa e strategia di comunicacion pa Aruba.
Den pasado e enfoke tawata riba con nos ta promove Aruba den exterior solamente y e diferencia ta cu awor nos a agrega e comunicacion cu e huesped asina cu e yega nos isla. E cambio aki ta duna nos e oportunidad pa educa y conscientisa nan riba e aspecto di proteccion y preservacion. Diferente charla duna door di e ekipo di A.T.A. a wordo comparti pa asina tin alineacion entre agencianan riba esfuersonan. Ta importante pa crea sinergianan conectando e comunidad local cue huespednan ariba varios iniciativanan local.
Un di e presentacionnan importante cu a tuma lugar a enfoca riba e aspecto “niche” cu ta wordo considera un motibo specifico cu un persona ta scoge un destinacion. E “niche” culinario y di bienestar a resalta den dialogo y tambe ta importante pa menciona e aspecto di cultura cu sigur ta un motibo importante cu huespednan di awendia ta considera ora di scoge un destinacion.
E sesion final a enfoca riba futuro di tecnologia, particularmente Inteligencia Artificial (AI), y su rol importante den mercadeo y e “customer journey”. Ta esencial pa monitor tendencianan mundial pa asina Aruba por keda competitivo.
E tipo di reunionan aki ta clave pa formula e plan di mercadeo pa e aña venidero y asina establece strategianan y tacticanan cu ta alinea cu metanan pa Aruba su turismo.
