Ta trata di un boto piskadó ku 2 Boneriano a bordo. Nan boto a kuminsá zink i inmediatamente nan a tuma kontakto ku Wardakosta via kanal 16 (VHF radio).
MOC a notifiká personal di helikòpter di Wardakosta pa sali den direkshon di e boto pa asistí. Tambe a notifiká outoridatnan na Boneiru tokante e kaso.
Mientrastantu, dos boto ku tabata serka, a tende e mensahe via radio i a nabegá rápidamente den direkshon di e boto pa yuda e dos persona nan. Na momento ku nan a yega, un di e boto nan a logra di saka nan for di awa.
Riba tera na Boneiru, a forma un tim di Duana, Polis militar (Koninklijke Marechaussee) i tambe Wardakosta, ku a sali riba e boto di duana mihó konosí komo ‘Kini Kini’ pa yuda e dos piskadó nan. Outoridatnan a tuma nan over for di e boto ku a saka nan for di awa, i a hiba nan bek tera. E dos piskadó nan ta den bon kondishon i no mester di asistensia médiko.
