Den cuadro di 40 aña di existencia di parlamento di Aruba tin basta proyecto planea. Presidente di parlamento Marlon Sneek ta duna di conoce cu un di e prome cambionan cu pueblo di Aruba ta bay mira ta e proyecto di hala di SHOCO. Parlamento su logo ta un Shoco ta pa e motibo aki mes a scoge e premio di hala di SHOCO, esaki ta un premio cu a start cu promocion dia 21 di Juli y lo termina te dia 21 di Augustus.
Segun presidente di parlamento Marlon Sneek e reaccion pa e proyecto aki ta hopi bon. Te ainda tin oportunidad pa por inscribi un hoben talentoso, busca e flyer di e Hala di SHOCO riba dje tin un QR Code unda cu ta haya e formulario digital y riba e formulario ta pone nomber y informacion di e hoben cu abo lo kier nomina pa haya e premio hala di SHOCO en- conexion cu 40 aña di celebracion di parlamento di Pais Aruba.
Na parlamento ta bay tin un comision cu ta consisti di e fraccionnan di parlamento unda cu e representantenan di parlamento ta bay wak tur e nominadonan y lo saca tres nominado y tur tres ta bay den un reunion en sala caminda e 21 parlamentario nan ta bay escoge cual lo bira e hoben cu merece e premio di e hala di SHOCO.
Segun presidente di parlamento Marlon Sneek e premio aki lo keda entrega dia 9 di september cu ta e apertura di aña parlamentario unda cu lo reconoce e hoben pa prome biaha cu e premio di hala di SHOCO den e aña parlamentario 2025-2026 y den 2026 ta e aña cu Aruba ta celebra 40 aña di parlamento di Pais Aruba.
Banda di e premio hala di SHOCO durante di e aña 2026 ta bay tin diferente celebracion y tin diferente comision cu ta trahando riba diferente ideanan cu a bin padilanti y cua di nan tur ta factibel pa por ehecuta. Segun presidente di parlamento un di nan ta bay ta un opendag unda cu cada fraccion ta haya e oportunidad di tin un stand di por duna historia y informacion di nan fraccion pa asina e pueblo di Aruba por conoce e fraccion un poco mas di cerca.
Na mes momento tambe e portanan di parlamento lo ta habri pa asina e comunidad di Aruba por drenta parlamento wak e sala , e oficina nan unda e trabou parlamentario ta tuma luga. E iniciativa aki ta pa pueblo drenta su cas, hopi biaha nos ta scucha cas di pueblo , pero pueblo mes no conoce su cas, pesey mes en- conexion cu 40 aña di parlamento di Aruba e portanan di parlamento lo ta habri pa pueblo di Aruba por drenta su cas.