Fraccion di PPA en varios ocasion a expresa ta importante pa parlamento para keto un rato den e 40 aña nan aki y evalua e 40 añanan cu a pasa tras di lomba si berdaderamente parlamento di Aruba a funciona demograficamente.
Sinembargo segun presidente di parlamento Marlon Sneek, Parlemento di Aruba a conoce hopi desaroyonan, un di nan ta cu parlamento a mira momentonan cu solamente tabata mira coalicion, partidonan a goberna nan so y despues pueblo di Aruba a bolbe haci e movecion pa vota den coalicion.
Segun presidente di parlamento tambe por evalua e forma cu cada parlamentario a traha pa su pueblo, dus cu a haci su trabou. Aki por saca afo cuanto ley di iniciativa tabatin. Amienda, mocion tabatin. Den forma aki tambe por trece un evaluacion unda cu ta mira e desaroyo di parlamento. Segun presidente di parlamento hopi hende ta lubida kico ta loke a cambia na 1986.
Na 1986 Pais Aruba a nace y kico kiermen esaki?, Aruba por a vota pa su propio gobernantenan cu ta bin goberna su Pais cu ta Aruba. Den pasado prome cu 1986 berdad tabata vota na Aruba , pero e diferencia ta cu tabata vota pa un college cu tabata atende cu cierto puntonan di Aruba, pero e gran mayoria ta e parlamento di Corsou cu tabata Antias e tempo ey tabata dicidi riba Aruba y Aruba no tabatin nada di bisa.
Arubianonan na Aruba prome cu 1986 tabata vota pa un gobierno di Antias, pero despues di e lucha cu alma y cuerpo cu a cuminsa for di Shon A Eman, y caba cu Betico Croes cu e logra esaki na final Aruba tabata liber y a nace Pais Aruba unda cu cada ciudadano na Aruba por a vota pa nan propio gobierno y no pa e gobierno di Antias cu tabata atende lo minimo di asuntonan di Pais Aruba.
Sinembargo a puntra presidente di Parlamento mirando e deseonan cu tin na e momentonan aki pa pone Aruba den man di Hulanda bek via di un Rijkswet cu principalmente partido FUTURO no ta mira y reconoce e balor di e trabounan y e forsanan y e dicon a traha pa Sali di e sistema prome cu 1986, si ta sinti cu Aruba ta coriendo un peliger den man di decisionnan di e generacion nobo den politica cu no sa y no ta compronde cu no ta tur ora placa ta tur cos , pero e union y e poder di maneho propio di comunidad di Aruba tin mas balor cu e placa cu nan wowo ta riba dje.
Presidente di parlamento Marlon Sneek den e parti aki ta indica cu parlamento mester haya e Rijkswet ainda, pero cu a haya diferente presentacionnan di minister Geoffrey Wever con tur cos ta canando, pero cu ta kere cu na momento cu parlamento haya e producto final di Rijkswet e discusionnan lo bin kico nos ta kere cu lo ta aceptabel y kico no ta aceptabel y na mes momento kico parlamento di Aruba ta considera bo derechonan of autonomia y kico no.
Segun presidente di Parlamento Marlon Sneek e producto di ley no ta na Parlamento ainda , pero asina cu e yega lo discuti riba esaki. Na mes momento presidente di parlamento ta indica cu hopi ta ser treci padilanti na momento cu ta papia di autonomia , ta trata di autonomia di ken? , di e politico of ta antonimia di e pueblo ?
Banda di tur cos te ainda ningun decision no a wordo tuma te na unda cu parlamento ta na altura di dje , pero na mes momento tambe parlamento te na e momentonan aki tin su poder como parlamento y asina cu parlamento yama e minister e mester presenta den parlamento , pero tambe minister nan ta presenta den reunion di comisionnan, asina presidente di parlamento ta indica.