Un Minister di Finansa mester tin fatsoen politico pa logra cosnan grandi pa Aruba
Den segunda tanda di reunion publico pa trata e prome Cambio di Presupuesto 2025, Parlamentario Xiomara Maduro a atende cu Minister Wever riba su ponencia, cu Gabinete Wever-Croes te na ultimo a aloca placa pa FCCA y pa baha loonbelasting via Nota di Cambio na comienso di aña 2025, insinuando cu MEP no tabata kier yuda comunidad.
Parlamentario Maduro a corigi MinFin Wever y a recorda e mandatario cu den un aña di eleccion bo mester tene cuenta cu fatsoen politico y pesey bo ta traha un presupuesto cu ta “beleidsarm” pa asina e gobierno nobo haya espacio pa introduci su maneho nobo. Esey ta simplemente regla di maneho di finansa publico cu tur MinFin mester sa.
Ta bisto cu Minister Wever ainda no sa esaki y pesey e ta recuri na busca excusa fofo riba MEP cu a traha diligentemente y conforme tur regla pa asina pone fondonan pa FCCA por traha casnan social y pa por a duna e clase media y miles di pensionado un rebaho di loonbelasting. Ta cambionan cu a wordo haci debidamente via Nota di Cambio. Lamentablemente MinFin Wever pa falta di conocemento a stop e placa pa FCCA.
Sinembargo na comienso di 2025, MEP a logra baha e loonbelasting y danki na e bon maneho di finansa publico, MEP a yuda pa asina 16 mil hende no paga loonbelasting mas, y pa 12 mil paga menos loonbelasting cu ta laga nan cu 300 florin extra den nan cartera tur luna.
“Ora como MinFin bo tin fatsoen politico, bo por logra cosnan grandi pa comunidad. Te cu awo MinFin Wever no a mustra cu e tin fatsoen politico, dus e falta siña esey ainda pa e por hiba un bon maneho financiero cu ta beneficia comunidad,” ta palabranan expresa pa Parlamentario Xiomara Maduro.