Ya a pasa 2 siman y 4 dia desde cu e reunion publico a keda yama pa Presidente di Parlamento pa Gobierno bin trata e consensusrijkswet supervision financiero den un reunion publico. Un reunion cu a keda yama 7 luna despues cu e prome peticion pa yama e reunion a keda entrega. Pasobra en total oposicion a entrega 5 peticion por escrito na Presidente di Parlamento pa yama dicho reunion.
Pa sorpresa di Parlamento completo Gobierno ta sali informa e dia ey, 29 di augustus 2025, cu nan a bay di acuerdo cu e contenido di e rijkswet (cu a keda duna e nomber HOFA), y cu esaki a keda presenta na Rijksministerraad caba y cu e ta riba agenda pa keda trata e dia ey door di Rijksministerraad. Na e momento ey nan a lubida di bisa cu e la keda trata y aproba caba. Y ful e proceso aki a tuma lugar sin cu Gobierno a bin informa di e negosacionnan riba bestuurlijk niveau, sin bin informa na ki palabracion a yega, sin duna documentacionnan al respecto y mas condenabel ta sin haya e CONSENSUS necesario di Parlamento pa por a entreg’e.
Proceso inaceptabel y inhustificabel
E proceso encamina pa Gobierno di Aruba ta inaceptabel pasobra no solamente nan a mina nos democracia parlamentario pero tambe nan no a mantene nan mes na e proceso describi na aña 2022 pa IPKO cu gobiernonan mester cana pa yega na un consensusrijkswet. Den e descripcion claramente ta para cu na tur momento mester informa y tin consensus di Parlamento. Algo cu den e situacion aki sigur no ta e caso.
Ta inaceptabel y inhustificabel cu Gobierno di Aruba ya di dia 13 di augustus 2025 a bay di acuerdo cu e consensusrijkswet HOFA (fecha cu nan no a menciona den reunion pero cu nos por a lesa den un documento di Ministerie van Binnenlandse Zaken en Koninkrijksrelaties) y mientras nan tabatin e oportunidad di informa Parlamento no na 1 pero na 6 ocasion di esaki prome cu e reunion di dia 29 di augustus intencionalmente a gaña Parlamento di Aruba. Pasobra nan a firma dia 13 di augustus 2025 y di dia 20 di augustus te cu dia 27 di augustus 2025 Gobierno tabata den 5 diferente reunion publico den Parlamento, caminda parlamentarionan a haci pregunta over e rijkswet y ningun momento gobierno tabatin e decencia pa informa parlamento cu ya nan a bay di acuerdo, a firma y entrega esaki na Rijksministerraad y cu e ta riba agenda dia 29 di augustus 2025. Un falta di respet grandi pa Parlamento di Aruba y un muestra di arogancia inaceptabel. Gobierno a pasa nan propio Fraccionnan un fastball.
Pakico IPKO a ancra den afsprakenlijst e proceso pa loke ta trata consensusrijkswet?
Ta bon pa pueblo corda e situacion di “Take it or leave it” cu a conduci na un “gedwongen consensus” durante e prome aña di pandemia. Un situacion cu te dia di awe ta incomprendibel y sigur no tabata husto. Enberdad nos ta agradecido pa e yudansa di Hulanda durante pandemia pero sigur nos no por compronde e actitud di a condiciona nan yudansa na un manera inhusto y tin ora asta incomprendibel (manera e recorte di 60 miyon pa aña den AZV mientras nos ta den pandemia).
Mirando cu na 2020 asta tabatin momento cu Hulanda a prohibi gobierno di Aruba pa comparti documento y info cu Parlamento di Aruba y cu a yega na consensus cu en principio no tabata boluntario, parlamentonan di Aruba, Corsou y Sint Maarten a atende e situacion indesea y inhusto aki den reunionnan di IPKO. Culminacion di e discusionnan tabata cu a bin cu un descripcion encuanto e proceso cu Gobiernonan mester cana pa yega na un consensusrijkswet mirando cu esaki no tabata duidelijk. Un di e puntonan tabata cu na tur momento mester mantene parlamentonan informa y cu na tur momento gobierno mester tin consensus di su parlamento.
Pregunta y conclusion crucial
Pregunta cu pueblo mester haci ta: ta consensus di ken gobierno tabatin pa firma y entrega consensus rijkswet HOFA? Pasobra Parlamento di Aruba na ningun momento a keda consulta, of a ricibi e documentonan y sigur no a duna consensus prome cu dia 13 di augustus cual fecha Gobierno a bay di acuerdo cu e contenido di HOFA. Parlamento di Aruba a ricibi documentonan dia 29 di augustus 2025, cual tabata e fecha cu Rijksministerraad a trata HOFA y a aproba pa e rijkswet por cuminsa e trayecto di internetconsultatie. Ironia di bida, internetconsultatie a cuminsa na Hulanda y ya tin casi 3 siman pasando y te dia di awe Parlamento di Aruba mes no a trata e documentonan entrega na nos dia 29 di augustus 2025. Te dia di awe no tin CONSENSUS di Parlamento di Aruba pa e ley aki. Y si nan hay’e mes, esaki lo ta achteraf cual ta un situacion cu pueblo di Aruba completo mester condena.
Diadomingo awor delegacion di Aruba ta sali pa Hulanda pa reunionnan Tripartiet y di IPKO y no obstante diferente peticion por escrito y verbal na Presidente di Parlamento pa yama e reunion pa nos trata HOFA prome cu nos subi avion esakinan tabata envano. Esaki ta trece nos na dos pregunta crucial:
Ta ki miedo gobierno tabatin pa bin Parlamento manera debe ser pa atende cu HOFA y haya consensus di Parlamento prome cu nan a bay di acuerdo cu esaki?
Ta ki miedo Presidente di Parlamento tin pa yama e reunion publico pa nos atende e situacion inaceptabel y inhustificbel pa loke ta trata e proceso encamina pa gobierno cu HOFA, sin papia mes di e contenido devastor di HOFA? Dicon no ta para pa credibilidad di Parlamento di Aruba?
Echo ta cu tin miembronan di AVP cu no ta di acuerdo cu e proceso encamina door di gobierno, lastimamente nan no tin e corahe pa bisa esaki publicamente y mucho menos haci lo corecto y para pa credibilidad di Parlamento y democracia parlamentario. Un mensahe mi tin pa nan: ”Awor ta e momento pa nos tur bisti petchi di Aruba y para pa nos autonomia y Status Aparte! Para pa bienestar general na lugar di bienestar di partido y esun personal! Pasobra ni cuanto boso hustifica, ni cuanto video boso traha, ni cuanto boso kier tira e fout riba Evelyn y ni cuanto boso gaña cu e tabata un done deal caba, ECHO TA GOBIERNO NO TABATIN Y AINDA NO TIN CONSENSUS DI PARLAMENTO PA A BAY DI ACUERDO CU E CONSENSUS RIJKSWET HOFA!