Diaranson mainta, Minister di Husticia mr. drs. Arthur Dowers a anuncia cu e proyecto di Hunto Pa Progreso ta drentando su ultimo dos lunanan. E maneho temporal di Hunto Pa Progreso ta dirigi riba personanan cu a drenta Aruba via aeropuerto y cu a “over stay” nan periodo di bishita na Aruba y a drenta e circuito ilegal. Esaki ta haci cu esnan cu a drenta di forma clandestino via por ehempel boto, lancha of hasta crucero, no ta bin na remarca pa ningun di e cuater trayectonan di Hunto Pa Progreso.
Pa e grupo aki di persona indocumenta, Minister Dowers ta recomenda pa nan haci uzo di e areglo automatico di dispensacion cu ta na vigor pa esnan cu sali boluntariamente for di Aruba. E personanan aki lo no haya prohibicion pa drenta Aruba bek den futuro si nan bandona Aruba boluntariamente y lo por hasta bishita Aruba como turista pa corto tempo. Teniendo na cuenta cu na 2026 autoridadnan competente lo intensiva e controlnan migratorio tur rond di Aruba, ta recomenda pa sali boluntariamente, paso esnan cu keda deporta pa autoridad, lo por haya un prohibicion di entrada cu un duracion di te cu 5 aña. Saliendo a base boluntario prome cu fini di 2025, ta duna e persona e posibilidad di drenta e trayecto regular di permiso di DIMAS na 2026.
Minister Dowers ta recomenda tur persona cu a drenta Aruba prome cu 1 di juli 2025 a traves di aeropuerto, pa haci uzo di e oportunidad unico di Hunto Pa Progreso. Por haci cita riba www.dimasaruba.aw of yega DIMAS sin cita di 5’or te cu 8’or di anochi di dialuna pa diabierna. Ademas tin cita diasabra entre 9’or di mainta y 3’or di atardi.
Press release: Gobierno di Aruba