Fundashon Konsiente orguyosamente ta djòin e kampaña nashonal di Alfabetisashon di Media Hulandes 2025, ku ta tuma lugá di 7 pa 14 di novèmber, pa konsientisá tokante e importansia di uzo responsabel i balansá di
pantaya bou di mucha, hóben i adulto. Ku e tema “Uzo balansá di pantaya”, e kampaña ta enkurashá pa hasi eskohonan konsiente di media i haña balansa den
e mundu digital.
Den e mundu digital di awendia, pantaya ta tur kaminda. Nos ta uza nan pa konektá, siña, hunga i relahá. Tòg nan por dominá nos atenshon fásilmente, stroba nos di drumi
bon i afektá nos bienestar físiko i emoshonal. E kampaña di e aña aki ta invitá tur hende pa para ketu i reflekshoná riba kon pantayanan ta forma nos bida i kon nos por hasi
medionan di komunikashon sirbi nos, en bes di nos ta nan esklavo.
Komo un coach di media sertifiká, Sra. Flavina Wanga, Direktor di Fundashon Konsiente, ta enfatisá ku uzo di pantaya saludabel ta kuminsá ku konsientisashon. “Sea
na kas, na skol òf den komunidat, nos ke empoderá mucha i hóbennan, i e adultonan ku ta guia nan, pa mehorá nan relashon ku pantaya,” e ta splika. “Nos meta ta pa hasi
teknologia un aliado pa kresementu i konekshon, no un distraishon.”
Pa nos islanan den Karibe, e konsientisashon aki ta spesialmente relevante. Tempu eksesivo dilanti di pantaya tin konsekuensianan di gran alkanse riba nos salú físiko i
mental, prestashon (na skol) i desaroyo di abilidatnan esensial di bida. Ora mucha pasa oranan largu dilanti di pantaya, nan kurpa ta move ménos, nan wowonan ta kansa mas lihé i e kalidat di soño hopi bia ta baha. Ora hóben keda eksponé na hopi ora riba medionan sosial, nan abilidat pa enfoká i pensa kritikamente por debilitá, afektando
tantu nan estudio komo nan balanse emoshonal. Pa adulto, pasenshi i resiliensia ta baha ora nan pasa hopi tempu den e mundu digital, kual ta kualidatnan vital pa guia e
siguiente generashon den un mundu ku ta kambia rápidamente.
Durante e siman di kampaña, Fundashon Konsiente lo kompartí un seri di post riba medionan sosial pa inspirá reflekshon i kambio. E postnan lo invitá muchanan pa
praktiká outo-regulashon, hóbennan pa fortalesé pensamentu krítiko i adultonan pa konstruí resiliensia digital. Dor di distribuí e mensahenan aki, e fundashon ta spera di stimulá kòmbersashonnan den hogarnan, klasnan i na boka di trabou.
Siman di Alfabetisashon di Media ta un kampaña di konsientisashon anual, organisá pa Netwerk Mediawijsheid na Hulanda. E tema di e aña aki ta enfoká riba uzo di pantaya di forma balansá i kreashon di kustumbernan digital mas sano.
Fundashon Konsiente ta
orguyoso di por trese e movementu aki na nos islanan den Reino Hulandes, adaptando
esaki na realidatnan lokal i enkurashando famianan pa hasi eskohonan konsiente i
balansá pa nan mes i nan yunan.
Fundashon Konsiente, ku sede na Kòrsou, ta traha pa promové media i alfabetisashon digital, uzo konsiente di pantaya i resiliensia bou di mucha i hóben, famianan, dosentenan, i edukadónan den e region di Karibe Hulandes. Bou di liderato di sra.
Flavina Wanga, coach di media sertifiká, e fundashon ta sostené komunidatnan den kultivá kustumbernan digital balansá i empoderá un i tur pa prosperá den e paisahe di media modèrno. Por fabor bishitá página di Facebook i/òf kuenta di Instagram di
Konsiente pa mas informashon.
Press release: Konsiente by Crab Social
