Konseho Sosial-Ekonómiko (SER) a emití awe su konseho na Minister di Desaroyo Sosial, Labor i Bienestar (SOAW) Charetti America-Francisca, tokante e proyekto di dekreto gubernamental, ku ta kontené medidanan general, a drenta na vigor for di 1 di ougùstùs 2023. E inisiativa ta reforsá poder atkisitivo di hendenan mayó di edat ku ta kai bou di e Seguro General di Behes (AOV) mediante un oumento dje subsidio komplementario i un ampliashon dje kantidat di esnan ku por apliká p’esaki.
For di promé di ougustus 2023, e subsidio mensual komplementario a subi di 130 Cg pa 169 Cg. For di e momento ei, tur benefisiario di AOV ku ta biba na Kòrsou i ku su ingreso total ta igual ku òf bou di e plafòn di 862 Cg mensualmente (basá riba 50 aña di kontribushon) por apliká pa e skema nobo. E proyekto di e dekreto gubernamental, konteniendo medidanan general, ta duna e medida ya tumá kaba un base legal.
E kosto finansiero adishonal ta kalkulá riba 6 miyon Cg pa aña, ku lo ser kubrí for di e pòst riba presupuesto aktual “AOV i Provisión di Emergensia” di e ministerio di SOAW. Ounke e medida ta duna un alivio leve na miles di persona adulto mayó ku ta dependé eksklusivamente di AOV komo nan entrada, SER ta wak e medida aki komo unu transitorio. Segun e órgano konsultivo ta nesesario pa sigui presta atenshon na indeksashon outomátiko di AOV, un plan di finansiamentu multi-anual i rekonosé ku mas medida struktural ta nesesario riba término largu teniendo kuenta ku faktornan demográfiko, manera un embehesementu aselerá di nos poblashon, i deterioro di poder di kompra di siudadano adulto mayó.
SER ta konsehá riba kodifikashon di dekreto ku ta legalisá oumento di subsidio riba AOV
