E proyecto” Where Culture Lives” a completa cu exito su fase di encuesta na Aruba, Boneiro, Corsou, Saba, Statia y Sint Maarten. E team di proyecto ta expresa nan aprecio sincero na tur miembro di publico cu a participa, y specialmente na e coordinadornan di isla y encuestadonan cu, cu nan dedicacion, a haci posibel un fuerte envolvimento di comunidad riba tur seis isla.
Cu titulo “Bo bos, Unda Cultura ta Biba”, e encuesta a investiga con arte, cultura y herencia ta duna forma na bida di tur dia na e islanan ABCSSS. E a invita publico pa comparti su bista riba con nan ta participa den cultura den nan comunidad; unda cultura ta tuma luga, kico ta sostene dje y cua ta e obstaculonan cu ainda ta existi.
E fase di encuesta a tuma luga den un periodo enfoca, for di fin di november 2025 te na principio di januari 2026, sigui na e gruponan di focu cu a tuma luga na augustus y september di aña pasa. A pesar di e periodo yen di fin di aña, tur isla a completa nan recoleccion di datonan na tempo.
E participacion a varia entre 40 y 150 respondiente pa isla, reflehando tanto tamaño di isla, representacion, como tambe e efikasidat di e campaña local di informacion. En general, e participantenan a responde di manera positivo y a indica prioridadnan cla. Hopi a señala e necesidad di mas financiamento y oportunidadnan di entrenamento pa emprendedornan creativo, hunto cu mas luganan accesibel pa practica, desaroya y mustra arte y herencia. Otro a resalta e importancia di mehora educacion cultural den scolnan.
Awor cu e fase di encuesta a caba, e team di proyecto a cuminsa interpreta y analisa e resultadonan. Nan lo reuni na fin di januari, y e fase di interpretacion colectivo aki tin como meta bay mas aya di solamente numbernan, duna nificacion na e descubrimentonan den nan contexto cultural, social y specifico pa cada isla.
E resultadonan lo sirbi directamente como input pa sesionnan di validashon basa riba isla, planifica pa principio di april, caminda e descubrimentonan preliminar lo wordo discuti cu artistanan, organisacionnan di cultura y herencia, representantenan di gobierno, partnernan di conocemento y otro actornan clave. E participantenan lo duna nan opinion, loke lo yuda fortalece e sentido di doñonan di comunidad riba e resultadonan y tambe sostene e desaroyo di recomendacionnan pa futuro politica cultural y inversionnan riba tur isla.
“Como team lider y como investigadonan, nos ta comprometi pa garantisa cu e resultadonan forma un base comparti,” segun Jorien Wuite, lider di proyecto. “E exploracion aki ta duna nos bon bista riba mapa cultural den Caribe Hulandes y nos kier cu e resultadonan sostene accion futuro di manera significativo, mescos cu prioridadnan di politica specifico pa cada isla pa oficialnan di gobierno y otro interesa. P’esey nos ta contento y orguyoso di a ricibi sosten pa e fase adicional aki cu sesionnan di validacion, mas discusionnan co- creativo y representacion amplio.”
“E bistanan recogi dor di e investigacion aki lo yuda nos compronde kico ta haci cultura y herencia di cada isla unico, mientras cu tambe ta permiti comparacionnan cu cuido cu ta honra diferencianan y ilumina patron nan comparti,” a bisa Ludmila Duncan, un di e investigadonan principal. “E balanse ey ta esencial si investigacion cultural mester ta tanto confiabel como cu tin impacto.”
E team di “Where Culture Lives” ta tambe orguyoso di anuncia e desaroyo di e Where Culture Lives Prize; un competencia di sosten riba cada isla cu lo invita artistanan y practicanan cultural pa manda trabou cu ta celebra bida cultural y expresa di manera creativo “unda cultura ta biba”. E competencia aki ta planea pa ta diferente di tur otro; funda den comunidad, inspira dor di bida diario y central riba con cultura ta parce y ta sinti riba e islanan. Mas detaye riba e premio aki lo wordo comparti pa fin di januari 2026.
E proyecto “Where Culture Lives” a wordo poni den comicion dor di e Ministerio Hulandes di Enseñansa, Cultura y Ciencia (OCW) na La Haya y na Boneiru (OCW y OCW-CG), y ta wordo maneha dor di e firma di consultorio basa na Sint Maarten, Lemonade B.V.