Gobierno di Aruba ta sigui invirti den fortalecemento di e infrastructura di Husticia cu e avance di e prome fase di renovacion di Politie Opleidinginstituut Edgar Joaquin (Watty) Vos. E instituto ta desempeña un rol fundamental den formacion di futuro polisnan di Aruba.
Minister di Husticia, Arthur Dowers, a indica cu e prome fase di e proyecto ta casi completa, permitiendo cu e diferente actividadnan di formacion por sigui den un ambiente mas moderno y funcional. E renovacion ta forma parti di un plan mas amplio cu lo wordo ehecuta den diferente fase, incluyendo un expansion futuro di e facilidadnan.
Segun Minister Dowers, e condicion di e edificio ta refleha un periodo largo den cual diferente facilidadnan di Husticia no a haya e mantencion y inversion necesario. El a enfatisa cu e reto no ta limita solamente na e Politie Opleidinginstituut Edgar Joaquin (Watty) Vos, sino cu ta un realidad cu Gobierno ta enfrentando den diferente edificio bou di Ministerio di Husticia.
“Nos meta no ta solamente renoba un edificio, sino crea un ambiente digno y funcional pa e profesionalnan cu diariamente ta prepara pa sirbi y proteha nos comunidad,” Minister Dowers a indica.
E minister a destaca cu, mes importante cu renovacion ta, implementa un plan di mantencion continuo tambe ta. Segun Dowers, solamente cu un bon maneho y mantencion preventivo ta posibel pa preserva inversionnan publico y evita cu edificionan bolbe deteriora cu e paso di tempo.
E renobacion di Politie Opleidinginstituut Edgar Joaquin (Watty) Vos ta representa un inversion den futuro di nos cuerpo policial, fortaleciendo e infrastructura necesario pa forma polisnan cu lo sigui garantisa siguridad y servicio di calidad pa Aruba.
