Un desaroyo tristo a sacudi comunidad awe mainta ora autoridadnan a logra haña James Wathey, lamentablemente sin bida, den un area di mondi cerca di rotonde di FTA na San Nicolas.
Segun informacion preliminar cu nos redaccion a logra recoge, e curpa a wordo descubri pabou di rotonde di FTA, den un pida mondi na un zandweg banda drechi di caminda. E locacion ta mas of menos un kilometro for di su cas.
Fuentes cerca di investigacion a indica cu, segun e prome indicacionnan for di parti forensico, ta parce cu James a trompica riba un stam di mata. E curpa a wordo haña cu cabes abou y sin señal di bida.
Autoridadnan a cera e area pa por haci e investigacion necesario, mientras cu e departamento forensico ta continua cu su trabou pa determina exactamente kico a sosode. Te na momento di publicacion, no tin mas detaye oficial confirma.
Polis no a cuminsa cu e buskeda trempan debi cu segun polis su protocol ta despues di 48 ora cu e persona ta perdi ta saca un buskeda oficial. Sinembargo awe un adulto mayor cu a cay den mondi a perde su bida.