Den caso di homber acusa di a abusa di su dos yiunan y a wordo declara liber
Hof di Corte Superior a cuminsa trata e apelacion di Ministerio Publico contra e sentencia di Hues den e caso penal di e homber G. Hues, dia 21 November 2023 a declara G. liber di e acusacion cu el a abusa di su dos yiunan menor di edad.
Por a compronde cu durante tratamento di e caso, G. a declara cu for di Februari 2022 el a banda cas ora el a sorprende su ex casa G. cu e homber B. di media den su cas. Esaki a sorprende Hof y Procurador General (PG) tambe. PG a pidi Hof pa pospone e caso pa haci mas investigacion.
Procurador General (PG) a acusa E.G. di a viola y haci actonan inmoral cu su dos yiunan menor di edad.
SOSPECHOSO TA NENGA
Hof a puntra G. con a sigui. G. a bisa cu cos a bay malo pasobra unda cu el a bay hendenan ta bisa cu e ta un pedofile y cu e mester bay cera. El a bisa cu e no tin contacto cu e muchanan. Abogado mr. Mohamed a splica cu durante su detencion tabatin divorcio y a palabra cu no ta haci nada ainda pendiente di e caso.
Hof a puntra G. si el a pensa kico a pone cu e muchanan a declara contra di dje. Segun G. e ta pensa cu hendenan a bisa e muchanan declara esaki. El a bisa cu na Februari 2022 el a sorprende su ex casa C. cu un e homber B., cu ta traha pa media, y a bay for di e cas. El a bisa Hof cu su ex casa a purba acerk’e pero el a nenga di pordon’e.
G. a bisa Hof cu e ta kere cu ta e ex casa a instaga su yiunan contra dje. G., cu hopi enfasis a bisa Hof, cu e ta sigur cu su yiunan nunca lo bay bisa asina contra dje. El a bisa cu e ta hopi sera cu su yiunan. G. a remarcas cu ta despues cu el a bay for di cas, e muchanan ta bay bisa algo asina y ta mira peliculanan di pornografia riba un tablet. El a bisa Hof cu el a keda sorprendi di esaki. Hof a puntra si e muchanan lo por a mira G. cu su ex tabata mira porno. G. a desmenti esaki. Hof a bisa cu e muchanan tabata mira cosnan cu nan no sa mes. G. a sigura cu ora e tabatin relacion cu su ex casa, su yiunan no tabata na cas. Hof a remarca cu ora e mama a mira e muchanan ta wak porno, e muchanan no a spanta sino a keda actua normal.
G. a bisa Hof cu e ta hopi sigur cu e nunca el a laga su yiunan mira porno. El a bisa cu e no sa con e muchanan tabata mira porno riba tablet.
MAIL NO TA CUADRA
Hof a mustra cu tabatin mas cu 500 video. Hof a menciona un mail cu nomber di e sospechoso aden pero G. a bisa Hof cu esey no ta su mail. El a menciona su mail y a bisa cu no ta solamente e sino su ex casa C. tambe ta usa e mail.
Hof a bisa cu tin un account na un site di porno cu tin e nomber di G. G. a reacciona cu e no sa di esey pasobra esey no ta su mail.
ACUSADO TA SOSPECHA SET UP DI SU EX CASA
G. a bisa Hof cu e ruman muher di su ex casa tabata reclama e ex casa pakico e ta laga e muchanan ariba caya. Hof a bisa cu e ruman muher di e ex a bisa cu e ex a bis’e kico el a mira y el a keda sorprendi. G. ta para riba cu e no a abusa di su yiunan y cu e ta sospecha cu ta su ex casa C. a haci esaki pa e muchanan declara contra dje.
Hof a mustra cu Hues den Promer Instancia a compara declaracion di e muchanan y ta mira un diferencia. E muchanan a duna declaracion separa na psychiater unda nan ta hayando tratamento. Hof a mustra cu Stichting Hunto ta mustra cu psycologo a constata cu e muchanan tin un trauma sexual. Por a yega na e conclusion aki ora a laga e muchanan haci cierto pinturanan. G. a bisa Hof., nunca el a ripara esaki serca su yiunan y ta duel e hopi di a constata esaki den e raport di Stichting Hunto. El a para riba cu e nunca a haci algo asina cu su yiunan. Ta asina cu su yiu muher a fayece na September 2022.
BOYCOT DI HOMBER DI MEDIA
G. a bisa Hof cu e homber B. cu ta traha den media, tabata blo molesti’e y hasta a bay na G. su trabao y bisa e hefe cu G. ta un pedofile y tene cuidao. Esey a causa cu G. a perde su trabao. Segun G., unda cu e bay busca trabao, e ex casa C. y su pareha B., tabata boycot G. pa e no haya trabao.
PG KIER HACI MAS INVESTIGACION
PG a bisa cu e caso ta hopi serio y e pregunta ta, kende a haci esaki cu e muchanan. PG ta haya cu mester claridad den e caso aki relaciona cu e hecho cu G. ta bisa cu for di Februari 2022 el a bay for di e cas. PG a bisa Hof cu e kier scucha e ex casa C. y su ruman muher. PG ta haya e punto aki ta hopi importante. Abogado mr. Mohamed a bisa cu G. a pidi pa scucha un bisiña dama B. di cas di mama di G., caminda G. ta bibando. Tambe e abogado a pidi pa scucha e amigo di G., e homber R. Mr. Mohamed tambe ta haya cu mester haci mas investigacion riba e asunto di mail di G.
HOF A POSPONE CASO
Hof a pospone e caso un rato pa bay evalua kico ta bay haci. Hof a bolbe y a dicidi cu enberdad tin un duda ki tempo G. a bandona e cas. Hof tambe kier scucha testigonan: ex casa C. y su ruman muher y e amiga bisiña di G. Hof no ta haya relevante pa scucha e amigo B.
Hof a bisa cu tambe mester haci investigacion riba e mail pa tin claridad. Hof a instrui PG pa averigua si G. ta inscribi na cas di su mama for di momento cu el a bay for di e cas. Tambe Hof kier sa cu ki regularidad G. tabata bishita e cas di e ex casa pa wak e muchanan y pa cuanto tempo. Hof a posponi e caso pa 22 Mei 2026.